Paracittaṃ pasīdatīti ettha imāni vatthūni. Tisso nāma daharabhikkhu jambukolacetiyaṅgaṇaṃ sammajjitvā saṅkāracchaḍḍaniṃ hatthena gahetvāva Aṭṭhāsi. Tasmiṃ khaṇe tissadattatthero nāma nāvāto oruyha cetiyaṅgaṇaṃ olokento bhāvitacittena sammajjanaṭṭhānanti ñatvā pañhāsahassaṃ pucchi. Itaro sabbaṃ vissajjesi. Aññatarasmiṃpi vihāre thero cetiyaṅgaṇaṃ sammajjitvā vattaṃ paricchindi. Yonakavisayato cetiyaṃ vandakā cattāro therā āgantvā cetiyaṅgaṇaṃ disvā anto appavisitvā dvāreyeva ṭhatvā eko thero aṭṭha kappe anussari eko soḷasa kappe eko vīsati kappe eko tiṃsa kappe anussari. Devatā attamanā hontīti ettha idaṃ vatthu. Ekasmiṃ kira vihāre eko bhikkhu cetiyaṅgaṇañca bodhiyaṅgaṇañca sammajjitvā nahāyituṃ gato. Devatā imassa vihārassa katakālato paṭṭhāya evaṃ vattaṃ pūretvā sammajjapubbo bhikkhu natthīti pasannacittā āgantvā pupphahatthā aṭṭhaṃsu. Thero āgantvā kataragāmavāsikatthāti āha. Bhante idheva vasāma imassa vihārassa katakālato paṭṭhāya evaṃ vattaṃ pūretvā sammajjapubbo bhikkhu natthīti tumhākaṃ bhante vatte pasīditvā pupphahatthā ṭhitamhāti devatā āhaṃsu. Pasādikasaṃvattaniyanti ettha idaṃ vatthu. Ekaṃ kira amaccaputtaṃ abhayattherañca ārabbha ayaṃ kathā udapādi kinnu kho amaccaputto pāsādiko abhayattheroti ubhopi ne ekasmiṃ ṭhāne olokessāmāti ñātakā amaccaputtaṃ alaṅkaritvā mahācetiyaṃ vandāpessāmāti agamaṃsu. Theramātāpi pāsādikaṃ cīvaraṃ kāretvā puttassa pahiṇi putto me kese Chindāpetvā imaṃ cīvaraṃ pārupitvā bhikkhusaṅghaparivuto mahācetiyaṃ vandatūti. Amaccaputto ñātiparivuto pācīnadvārena cetiyaṅgaṇaṃ ārūḷho. Abhayatthero bhikkhusaṅghaparivuto dakkhiṇadvārena cetiyaṅgaṇaṃ ārūhitvā cetiyaṅgaṇe tena saddhiṃ samāgantvā āha kiṃ tvaṃ āvuso mahallakattherassa sammajjanaṭṭhāne kacavaraṃ chaḍḍetvā mayā saddhiṃ yugagāhaṃ gaṇhasīti. Atītattabhāve kira abhayatthero mahallakatthero nāma hutvā kājaragāme cetiyaṅgaṇaṃ sammajji. Amaccaputto mahāupāsako hutvā sammajjanaṭṭhāne kacavaraṃ gahetvā chaḍḍesi.