Bahulīkatāyāti punappunaṃ katāya. Yānīkatāyāti suyuttayānasadisāya katāya. Vatthukatāyāti yathā patiṭṭhā hoti evaṃ katāya. Anuṭṭhitāyāti anu anu pavattitāya niccādhiṭṭhitāyāti attho. Paricittāyāti samantato citāya sabbadisāsu citāya ācitāya abhivaḍḍhitāyāti attho. Susamāraddhāyāti suṭṭhu samāraddhāya vasībhāvaṃ upanītāyāti attho. Na pāpakaṃ supinanti pāpakameva na passati bhaddakaṃ pana vuḍḍhikāraṇabhūtaṃ passati. Devatā rakkhantīti ārakkhadevatā dhammikaṃ rakkhaṃ paccupaṭṭhāpenti. Tuvaṭaṃ cittaṃ samādhiyatīti khippaṃ samādhiyati. Uttariṃ appaṭivijjhantoti mettajjhānato uttariṃ arahattaṃ asacchikaronto sekho vā puthujjano vā hutvā kālaṃ karonto brahmalokūpago hoti. Sesaṃ sabbattha uttānamevāti.

Ekādasakavaṇṇanāpariyosānā

ekuttarikavaṇṇanā niṭṭhitā.