{367} Anuyogavattagāthāsu paṭhamagāthā vuttatthā eva. Vatthuṃ vipattiṃ āpattiṃ nidānaṃ ākāraakovido pubbāparaṃ na jānātīti vatthuntiādīnaṃ na jānātipadena sambandho. Akovidoti padassa save tādisakoti iminā sambandho. Tasmā ayamettha yojanā. Yo bhikkhu pārājikādīnaṃ vatthuṃ na jānāti catubbidhaṃ vipattiṃ na jānāti sattavidhaṃ āpattiṃ na jānāti imaṃ sikkhāpadaṃ amukasmiṃ nāma nagare paññattanti evaṃ nidānaṃ na jānāti. Idaṃ purimavacanaṃ idaṃ pacchimavacananti pubbāparaṃ na jānāti. Idaṃ kataṃ idaṃ akatanti katākataṃ na jānāti. Samena cāti teneva pubbāparaṃ ajānantassa samena aññāṇena katākataṃ na jānātīti vuttaṃ hoti. Evaṃ Tāva na jānātipadena saddhiṃ sambandho veditabbo. Yaṃ panetaṃ ākāraakovidoti vuttaṃ. Tattha ākāraakovidoti kāraṇākāraṇe akovido. Iti yvāyaṃ vatthuādīni ca na jānāti ākārassa ca akovido save tādisako bhikkhu appaṭikkhoti vuccati. Kammañca adhikaraṇañcāti imesaṃpi padānaṃ na jānātipadeneva sambandho. Ayaṃ panettha yojanā. Tatheva yvāyaṃ kammañca na jānāti adhikaraṇañca na jānāti. Sattappakāre samathe cāpi akovido rāgādīhi pana ratto duṭṭho ca mūḷho ca bhayena bhayā gacchati sammohena mohā gacchati rattattā pana duṭṭhattā ca chandā dosā gacchati. Paraṃ saññāpetuṃ asamatthatāya na ca saññattikusalo. Kāraṇākāraṇadassane asamatthatāya nijjhattiyā ca akovido. Attano sadisāya parisāya laddhattā laddhapakkho hiriyā paribāhirattā ahiriko kāḷakehi kammehi samannāgatattā kaṇhakammo dhammādariya- puggalādariyānaṃ abhāvato anādaro. Save tādisako bhikkhu appaṭikkhoti vuccati. Nappaṭikkhitabbo na oloketabbo. Na sammannitvā issariyādhipaccajeṭṭhakaṭṭhāne ṭhapetabboti attho. Sukkapakkhagāthānaṃpi yojanānayo vuttanayeneva veditabboti.

Cūḷasaṅgāmavaṇṇanā niṭṭhitā.