{411} Vatthuvipannañca hotīti akappiyadussaṃ hoti. Kālavipannaṃ nāma ajja dāyakehi dinnaṃ sve saṅgho kaṭhinatthārakassa deti. Karaṇavipannaṃ nāma tadaheva chinditvā akataṃ.

{412} Kaṭhinaṃ jānitabbantiādipucchāya vissajjane. Tesaṃyeva dhammānanti yesu rūpādīsu dhammesu sati kaṭhinaṃ nāma hoti tesaṃ samodhānamissībhāvo. Nāmaṃ nāmakammantiādinā pana kaṭhinanti idaṃ bahūsu dhammesu nāmamattaṃ na paramatthato eko dhammo atthīti dasseti. Catuvīsatiyā ākārehīti na ullikhitamattenātiādīhi pubbe vuttakāraṇehi. Sattarasahi ākārehīti āhatena atthataṃ hoti kaṭhinantiādīhi pubbe vuttakāraṇehi. Nimittakammādīsu yaṃ vattabbaṃ taṃ sabbaṃ kaṭhinakkhandhakavaṇṇanāyaṃ vuttaṃ.

{416} Ekuppādā ekanirodhāti uppajjamānāpi ekato uppajjanti nirujjhamānāpi ekato nirujjhanti. Ekuppādā nānānirodhāti uppajjamānā ekato uppajjanti nirujjhamānā nānā nirujjhanti. Kiṃ vuttaṃ hoti. Sabbepi atthārena saddhiṃ ekato uppajjanti. Atthāre hi sati uddhāro nāma hoti. Nirujjhamānā panettha purimā dve atthārena saddhiṃ ekato nirujjhanti uddhārabhāvaṃ pāpuṇanti. Atthārassa hi nirodho etesañca uddhārabhāvo ekakkhaṇe hoti. Itare nānā nirujjhanti. Tesupi uddhārabhāvaṃ pattesu atthāro tiṭṭhatiyeva. Sesaṃ sabbattha uttānamevāti.

Kaṭhinabhedavaṇṇanā niṭṭhitā.