{467} Kaṭhinatthāravagge. Otamasikoti andhakāragato. Taṃ hi vandantassa mañcapādādīsupi nalāṭaṃ paṭihaññeyya. Asamannāharantoti kiccapasutattā vandanaṃ asamannāharanto. Suttoti niddaṃ okkanto. Ekāvattoti ekato āvatto sapattapakkhe ṭhito verī visabhāgapuggalo vuccati ayaṃ avandiyo. Ayaṃ hi vandiyamāno pādenapi pahareyya. Aññāvihitoti aññaṃ cintayamāno.

Khādantoti piṭṭhakhajjakādīni khādanto. Uccāraṃ ca passāvaṃ ca karonto anokāsagatattā avandiyo. Ukkhittakoti tividhenapi ukkhepanīyakammena ukkhittako avandiyo. Tajjanīyādikammakatā pana cattāro vanditabbā. Uposathapavāraṇāpi tehi saddhiṃ labbhanti. Ādito paṭṭhāya ca vuttesu avandiyesu naggañca ukkhittakaṃ ca vandantasseva āpatti itaresaṃ pana asāruppatthena ca antarā vuttakāraṇena ca vandanā paṭikkhittā. Ito paraṃ pacchā upasampannādayo dasapi āpattivatthubhāveneva avandiyā. Te vandantassa hi niyameneva āpatti. Iti imesu pañcasu pañcakesu terasa jane vandantassa anāpatti. Dvādasannaṃ vandantassa āpatti.

{468} Ācariyo vandiyoti pabbajjācariyo upasampadācariyo nissayācariyo uddesācariyo ovādācariyoti ayaṃ pañcavidhopi ācariyo vandiyo. Sesaṃ sabbattha uttānamevāti.

Kaṭhinatthāravaggavaṇṇanā niṭṭhitā.