[๘๙๔] สมโถ สมฺมุขาวินโย สมฺมุขาวินโย สมโถ ฯ สมโถ เยภุยฺยสิกา เยภุยฺยสิกา สมโถ ฯ สมโถ สติวินโย สติวินโย สมโถ ฯ สมโถ อมูฬฺหวินโย อมูฬฺหวินโย สมโถ ฯ สมโถ ปฏิญฺญาตกรณํ ปฏิญฺญาตกรณํ สมโถ ฯ สมโถ ตสฺสปาปิยสิกา ตสฺสปาปิยสิกา สมโถ ฯ สมโถ ติณวตฺถารโก ติณวตฺถารโก สมโถ ฯ เยภุยฺยสิกา สติวินโย อมูฬฺหวินโย ปฏิญฺญาตกรณํ ตสฺสปาปิยสิกา ติณวตฺถารโก อิเม สมถา สมถา โน สมฺมุขาวินโย สมฺมุขาวินโย สมโถ เจว สมฺมุขาวินโย จ ฯ สติวินโย อมูฬฺหวินโย ปฏิญฺญาตกรณํ ตสฺสปาปิยสิกา ติณวตฺถารโก สมฺมุขาวินโย อิเม สมถา สมถา โน เยภุยฺยสิกา เยภุยฺยสิกา สมโถ เจว เยภุยฺยสิกา จ ฯ อมูฬฺหวินโย ปฏิญฺญาตกรณํ ตสฺสปาปิยสิกา ติณวตฺถารโก สมฺมุขาวินโย เยภุยฺยสิกา อิเม สมถา สมถา โน สติวินโย สติวินโย สมโถ เจว สติวินโย จ ฯ ปฏิญฺญาตกรณํ ตสฺสปาปิยสิกา ติณวตฺถารโก สมฺมุขาวินโย เยภุยฺยสิกา สติวินโย อิเม สมถา สมถา โน อมูฬฺหวินโย อมูฬฺหวินโย สมโถ เจว อมูฬฺหวินโย จ ฯ ตสฺสปาปิยสิกา ติณวตฺถารโก สมฺมุขาวินโย เยภุยฺยสิกา สติวินโย อมูฬฺหวินโย อิเม สมถา สมถา โน ปฏิญฺญาตกรณํ ปฏิญฺญาตกรณํ สมโถ เจว ปฏิญฺญาตกรณญฺจ ฯ ติณวตฺถารโก สมฺมุขาวินโย เยภุยฺยสิกา สติวินโย อมูฬฺหวินโย ปฏิญฺญาตกรณํ อิเม สมถา สมถา โน ตสฺสปาปิยสิกา ตสฺสปาปิยสิกา สมโถ เจว ตสฺสปาปิยสิกา จ ฯ สมฺมุขาวินโย เยภุยฺยสิกา สติวินโย อมูฬฺหวินโย ปฏิญฺญาตกรณํ ตสฺสปาปิยสิกา อิเม สมถา สมถา โน ติณวตฺถารโก ติณวตฺถารโก สมโถ เจว ติณวตฺถารโก จ ฯ

[๑]

[๘๙๕] วินโย สมฺมุขาวินโย สมฺมุขาวินโย วินโย ฯ วินโย เยภุยฺยสิกา เยภุยฺยสิกา วินโย ฯ วินโย สติวินโย สติวินโย วินโย ฯ วินโย อมูฬฺหวินโย อมูฬฺหวินโย วินโย ฯ วินโย ปฏิญฺญาตกรณํ ปฏิญฺญาตกรณํ วินโย ฯ วินโย ตสฺสปาปิยสิกา ตสฺสปาปิยสิกา วินโย ฯ วินโย ติณวตฺถารโก ติณวตฺถารโก วินโย ฯ สมถสมฺมุขาวินยวารํ นิฏฺฐิตํ เอกาทสมํ ๒ ฯ