TIPITAKA Volume 8 : PALI ROMAN Vinaya Pitaka Vol 8 : Vinaya. Parivāra

[1165] Katīhi nu kho bhante aṅgehi samannāgatassa bhikkhuno kammaṃ na paṭippassambhetabbanti . pañcahupāli aṅgehi samannāgatassa bhikkhuno kammaṃ na paṭippassambhetabbaṃ . katamehi pañcahi . Āpattiṃ āpanno kammakato upasampādeti nissayaṃ deti sāmaṇeraṃ upaṭṭhāpeti bhikkhunovādakasammatiṃ sādiyati sammatopi bhikkhuniyo ovadati . imehi kho upāli pañcahaṅgehi samannāgatassa bhikkhuno kammaṃ na paṭippassambhetabbaṃ. {1165.1} Aparehipi upāli pañcahaṅgehi samannāgatassa bhikkhuno kammaṃ na paṭippassambhetabbaṃ . katamehi pañcahi . yāya āpattiyā saṅghena kammaṃ kataṃ hoti taṃ āpattiṃ āpajjati aññaṃ vā tādisikaṃ tato vā pāpiṭṭhataraṃ kammaṃ garahati kammike garahati. Imehi kho upāli pañcahaṅgehi samannāgatassa bhikkhuno kammaṃ na paṭippassambhetabbaṃ . Aparehipi upāli pañcahaṅgehi samannāgatassa bhikkhuno kammaṃ na paṭippassambhetabbaṃ . katamehi pañcahi . buddhassa avaṇṇaṃ bhāsati dhammassa avaṇṇaṃ bhāsati saṅghassa avaṇṇaṃ bhāsati micchādiṭṭhiko Ca hoti ājīvavipanno ca . imehi kho upāli pañcahaṅgehi samannāgatassa bhikkhuno kammaṃ na paṭippassambhetabbaṃ . Aparehipi upāli pañcahaṅgehi samannāgatassa bhikkhuno kammaṃ na paṭippassambhetabbaṃ . katamehi pañcahi . alajjī ca hoti bālo ca apakatatto ca omaddakārako ca hoti vattesu sikkhāya ca na paripūrikārī . imehi kho upāli pañcahaṅgehi samannāgatassa bhikkhuno kammaṃ na paṭippassambhetabbanti.