"พุทฺโธ"ติ กิตฺตยนฺตสฺส, ยสฺส ๕- กาเย ภวติ ยา ปีติ, วรเมว หิ สา ปีติ, กสิเณนาปิ ชมฺพุทีปสฺส. `ธมฺโม'ติ ฯเปฯ `สํโฆ'ติ

กิตฺตยนฺตสฺส, ยสฺส กาเย ภวติ ยา ปีติ, วรเมว หิ สา ปีติ, กสิเณนาปิ ชมฺพุทีปสฺสา"ติ จ.

"เย ภิกฺขเว พุทฺเธ ปสนฺนา, อคฺเค เต ปสนฺนา"ติ จ เอวมาทีหิ อเนกสเตหิ สุตฺตนฺเตหิ ๖- รตนตฺตเย ปีติโสมนสฺสํเยว วณฺณิตนฺติ? สจฺจํ วณฺณิตํ, ตํ ปน เนกฺขมฺมนิสฺสิตํ. อิธ "อมฺหากํ พุทฺโธ อมฺหากํ ธมฺโม"ติ อาทินา นเยน อายสฺมโต ฉนฺนสฺส อุปฺปนฺนสทิสํ เคหนิสฺสิตํ ปีติโสมนสฺสํ อธิปฺเปตํ. อิทํ หิ ฌานาทิปฏิลาภาย อนฺตรายกรํ โหติ. เตเนวายสฺมา ฉนฺโนปิ ยาว พุทฺโธ น ปรินิพฺพายิ, ตาว วิเสสํ นิพฺพตฺเตตุํ นาสกฺขิ, ปรินิพฺพานกาเล ปญฺญตฺเตน ปน พฺรหฺมทณฺเฑน ตชฺชิโต ตํ ปีติโสมนสฺสํ ปหาย วิเสสํ นิพฺพตฺเตสิ. ตสฺมา อนฺตรายกรํเยว สนฺธาย อิทํ วุตฺตนฺติ เวทิตพฺพํ. อยํ หิ โลภสหคตา ๗- ปีติ, โลโภ จ โกธสทิโสว. ยถาห:-