เสยฺยถีทนฺติ นิปาโต. ตสฺสตฺโถ:- กตโม โส พีชคามภูตคาโม, ยสฺส สมารมฺภมนุยุตฺตา วิหรนฺตีติ. ตโต ตํ ทสฺเสนฺโต มูลพีชนฺติ อาทิมาห. ตตฺถ มูลพีชํ นาม หลิทฺทิ ๒- สิงฺคิเวรํ วจา วจตฺถํ ๓- อติวิสํ กฏุกโรหิณี อุสีรํ ภทฺทมุตฺตกนฺติ เอวมาทิ. ขนฺธพีชํ นาม อสฺสตฺโถ นิโครฺโธ ปิลกฺโข ๔- อุทุมฺพโร กจฺฉโก กปิตฺถโนติ เอวมาทิ. ผฬุพีชํ นาม อุจฺฉุ นโฬ เวฬูติ เอวมาทิ. อคฺคพีชํ นาม อชฺชกํ ๕- ผณิชฺชกํ หริเวรนฺติ เอวมาทิ. พีชพีชํ นาม ปุพฺพณฺณํ อปรณฺณนฺติ เอวมาทิ. สพฺพเญฺหตํ รุกฺขโต วิโยชิตํ วิรูหนสมตฺถเมว "พีชคาโม"ติ วุจฺจติ. รุกฺขโต ปน อวิโยชิตํ อสุกฺขํ "ภูตคาโม"ติ วุจฺจติ. ตตฺถ ภูตคามสมารมฺโภ ปาจิตฺติยวตฺถุ, พีชคามสมารมฺโภ ทุกฺกฏวตฺถูติ เวทิตพฺโพ.

@๔ ก. มิลกฺขุ ๕ อิ. อชฺชุกํ

[๑๒] สนฺนิธิการกปริโภคนฺติ สนฺนิธิกตสฺส ปริโภคํ. ๑- ตตฺถ ทุวิธา กถา วินยวเสน จ สลฺเลขวเสน จ. วินยวเสน ตาว ยํกิญฺจิ อนฺนํ อชฺช ปฏิคฺคหิตํ อปรชฺชุ สนฺนิธิการกํ โหติ, ตสฺส ปริโภเค ปาจิตฺติยํ. อตฺตนา ลทฺธํ ปน สามเณรานํ ทตฺวา เตหิ ลทฺธํ ฐปาเปตฺวา ทุติยทิวเส ภุญฺชิตุํ วฏฺฏติ, สลฺเลโข ปน น โหติ.