@๗ องฺ. ทสก. ๒๔/๑๐๗ โธวนสุตฺต ๘ วินย. ๒/๓๒๔/๒๖๘ อุยฺโยธิกสิกฺขาปท
[๑๔] ปมาโท เอตฺถ ติฏฺฐตีติ ปมาทฏฺฐานํ, ชูตญฺจ ตํ ปมาทฏฺฐานญฺจาติ ชูตปฺปมาทฏฺฐานํ. เอเกกาย ปนฺติยา อฏฺฐ อฏฺฐ ปทานิ อสฺสาติ อฏฺฐปทํ. ทสปเทปิ เอเสว นโย. อากาสนฺติ อฏฺฐปททสปเทสุ วิย อากาเสเยว กีฬนํ. ปริหารปถนฺติ ภูมิยํ นานาปถมณฺฑลํ กตฺวา ตตฺถ ตตฺถ ปริหริตพฺพํ ปถํ ปริหรนฺตานํ กีฬนํ. สนฺติกนฺติ ๑- สนฺติกกีฬนํ. ๒- เอกชฺฌํ ฐปิตา สาริโย วา สกฺขราโย วา อจาเลนฺตา นเขเนว อปเนนฺติ จ อุปเนนฺติ จ, สเจ ตตฺถ กาจิ จลติ, ปราชโย โหติ. เอวรูปาย กีฬาเยตํ อธิวจนํ. ขลิกนฺติ ชูตผลเก ปาสกกีฬนํ. ฆฏิกา วุจฺจติ ทีฆทณฺฑเกน รสฺสทณฺฑกปหรณกีฬา. สลากหตฺถนฺติ ลาขาย วา มญฺชิฏฺฐิกาย ๓- วา ปิฏฺฐอุทเกน วา สลากหตฺถํ เตเมตฺวา "กึ โหตู"ติ ภูมิยํ วา ภิตฺติยํ วา ตํ ปหริตฺวา หตฺถิอสฺสาทิรูปทสฺสนกีฬา. ๔- อกฺขนฺติ คุฬกีฬนํ. ๕- ปงฺคจีรํ วุจฺจติ ปณฺณนาฬิกา ตํ ธมนฺตา กีฬนฺติ, วงฺกกนฺติ คามทารกานํ กีฬนกํ ขุทฺทกนงฺคลํ. โมกฺขจิกนฺติ ๖- สมฺปริวตฺตกกีฬนํ, อากาเส วา ทณฺฑกํ คเหตฺวา ภูมิยํ วา สีสํ ฐเปตฺวา เหฏฺฐุปริยภาเวน ปริวตฺตนกีฬนนฺติ วุตฺตํ โหติ. จิงฺคุลิกํ วุจฺจติ ตาลปณฺณาทีหิ กตํ วาตปฺปหาเรน ปริพฺภมนจกฺกํ. ปตฺตาฬฺหกํ วุจฺจติ ปณฺณนาฬิกา, ตาย วาลุกาทีนิ มินนฺตา กีฬนฺติ. รถกนฺติ ขุทฺทกรถํ. ธนุกนฺติ ขุทฺทกธนุเมว. อกฺขริกา วุจฺจติ อากาเส วา ปิฏฺฐิยํ วา อกฺขรชานนกีฬา. มเนสิกา นาม มนสา จินฺติตชานนกีฬา. ยถาวชฺชํ นาม กาณกุณิขุชฺชาทีนํ ยํ ยํ วชฺชํ, ตํ ตํ ปโยเชตฺวา ทสฺสนกีฬา.
[๑๕] อาสนฺทินฺติ ปมาณาติกฺกนฺตาสนํ. "อนุยุตฺตา วิหรนฺตี"ติ อิทํ อเปกฺขิตฺวา ปน สพฺพปเทสุ อุปโยควจนํ กตํ. ปลฺลงฺโกติ ปาเทสุ วาฬรูปานิ ฐเปตฺวา กโต. โคนโกติ ทีฆโลมโก มหาโกชโว, จตุรงฺคุลาธิกานิ กิร ตสฺส โลมานิ. จิตฺตกนฺติ วานวิจิตฺตํ อุณฺณามยตฺถรณํ. ปฏิกาติ อุณฺณามโย เสตปจฺจตฺถรโณ. ๗- ปฏลิกาติ ฆนปุปฺผโก อุณฺณามยตฺถรโณ, โย ๘- "อาลมกปตฺโต"ติปิ ๙- วุจฺจติ.