[๒๘] เอวํ พฺรหฺมทตฺเตน วุตฺตวณฺณสฺส อนุสนฺธิวเสน ติวิธํ สีลํ วิตฺถาเรตฺวา อิทานิ ภิกฺขุสํเฆน วุตฺตวณฺณสฺส อนุสนฺธิวเสน "อตฺถิ ภิกฺขเว อญฺเญว ธมฺมา คมฺภีรา ทุทฺทสา"ติ อาทินา นเยน สุญฺญตาปฺปกาสนํ อารภิ. ตตฺถ ธมฺมาติ คุเณ เทสนายํ ปริยตฺติยํ นิสฺสตฺเตติ เอวมาทีสุ ธมฺมสทฺโท วตฺตติ.

"นหิ ธมฺโม อธมฺโม จ อุโภ สมวิปากิโน

อธมฺโม นิรยํ เนติ, ธมฺโม ปาเปติ สุคฺคตินฺ"ติ ๒-

อาทีสุ หิ คุเณ ธมฺมสทฺโท. "ธมฺมํ โว ภิกฺขเว เทสิสฺสามิ อาทิกลฺยาณนฺ"ติ ๓- อาทีสุ เทสนายํ. "อิธ ภิกฺขุ ธมฺมํ ปริยาปุณาติ สุตฺตํ เคยฺยนฺ"ติ ๔- อาทีสุ ปริยตฺติยํ. "ตสฺมึ โข ปน สมเย ธมฺมา โหนฺติ, ขนฺธา โหนฺตี"ติ ๕- อาทีสุ นิสฺสตฺเต. อิธ ปน คุเณ วตฺตติ. ตสฺมา "อตฺถิ ภิกฺขเว อญฺเญว ตถาคตสฺส คุณา"ติ เอวเมตฺถ อตฺโถ ทฏฺฐพฺโพ.