[๖๓] ฉนฺโท วา ราโค วาติ อปฺปฏิชานนฺโตปิ ๓- สหสา กุสลเมว "กุสลนฺ"ติ วตฺวา อกุสลเมว "อกุสลนฺ"ติ วตฺวา "มยา อสุกสฺส นาม เอวํ พฺยากตํ, กินฺตํ สุพฺยากตนฺ"ติ อญฺเญ ปณฺฑิเต ปุจฺฉิตฺวา เตหิ "สุพฺยากตํ ภทฺรมุข, `กุสลเมว ตยา กุสลํ อกุสลเมว อกุสลนฺ'ติ พฺยากตนฺ"ติ วุตฺเต "นตฺถิ มยา สทิโส ปณฺฑิโต"ติ เอวํ เม ตตฺถ ฉนฺโท วา ราโค วา อสฺสาติ อตฺโถ. เอตฺถ จ ฉนฺโท ทุพฺพลราโค, ราโค พลวราโคติ. ๔- โทโส วา ปฏิโฆ วาติ กุสลํ ๕- ปน "อกุสลนฺ"ติ, อกุสลํ วา "กุสลนฺ"ติ วตฺวา อญฺเญ ปณฺฑิเต ปุจฺฉิตฺวา เตหิ "ทุพฺยากตํ ตยา"ติ วุตฺเต "เอตฺตกมฺปิ นาม น ชานามี"ติ ตตฺถ เม อสฺส โทโส วา ปฏิโฆ วาติ อตฺโถ. อิธาปิ โทโส ทุพฺพลโกโธ, ปฏิโฆ พลวโกโธ.

ตํ มมสฺส อุปาทานํ, โส มมสฺส วิฆาโตติ ตํ ฉนฺทราคทฺวยํ มม อุปาทานํ อสฺส, โทสปฏิฆทฺวยํ วิฆาโต. อุภยมฺปิ วา ทฬฺหคฺคหณวเสน อุปาทานํ, วิหนนวเสน วิฆาโต. ราโค หิ อมุญฺจิตุกามตาย อารมฺมณํ คณฺหาติ ชลูกา วิย. โทโส วินาเสตุกามตาย อาสีวิโส วิย. อุโภปิ เจเต สนฺตาปกฏฺเฐน วิหนนฺติเยวาติ "อุปาทานนฺ"ติ จ "วิฆาโต"ติ จ วุตฺตา. เสสํ ปฐมวารสทิสเมว.

@๓ ฉ.ม., อิ. อชานนฺโตปิ ๔ ฉ.ม., อิ. พลวราโค. ๕ ก. กุสลมฺปิ