@๓ ม. มนฺตยึสุ ๔ อิ. มูสิกํ ๕ ก. มูลจฺฉํ, ม. มูลเฉชฺชํ ๖ ฉ. อุจฺฉงฺคํ "โมฬึ พนฺธิตฺวา ปวิสิตุํ มา เทถา"ติ อาห. ตโต สุวณฺณปาทุกาสุ ภตฺตํ ฐเปตฺวา ปิทหิตฺวา ปาทุกา อารุยฺห ปวิสติ. ราชา เตน ยาเปติ. ปุน "กถํ ยาเปตี"ติ ปุจฺฉิตฺวา ตมตฺถํ สุตฺวา "ปาทุกา อารุยฺห ปวิสิตุมฺปิ มา เทถา"ติ อาห. ตโต ปฏฺฐาย เทวี คนฺโธทเกน นฺหายิตฺวา สรีรํ จตุมธุเรน มกฺเขตฺวา ปารุปิตฺวา ปวิสติ. ราชา ตสฺสา สรีรํ เลหิตฺวา ยาเปติ. ปุน ปุจฺฉิตฺวา ตํ ปวตฺตึ สุตฺวา "อิโต ปฏฺฐาย มยฺหํ มาตุ ปเวสนํ นิวาเรถา"ติ อาห. เทวี ทฺวารมูเล ฐตฺวา "สามิ พิมฺพิสาร เอตํ ทหรกาเล มาเรตุํ น อทาสิ, อตฺตโน สตฺตุํ อตฺตนาว โปเสสิ, อิทนฺทานิ ๑- เต ปจฺฉิมทสฺสนํ, นาหํ อิโต ปฏฺฐาย ตุเมฺห ปสฺสิตุํ ลภามิ, สเจ มยฺหํ โทโส อตฺถิ, ขมถ เทวา"ติ โรทิตฺวา กนฺทิตฺวา นิวตฺติ.

ตโต ปฏฺฐาย รญฺโญ อาหาโร นตฺถิ. ราชา มคฺคผลสุเขน จงฺกเมน ยาเปติ. อติวิย จสฺส ๒- อตฺตภาโว วิโรจติ. โส "กถมฺปิ ๓- เม ภเณ ปิตา ยาเปตี"ติ ปุจฺฉิตฺวา "จงฺกเมน ๔- เทว ยาเปติ, อติวิย จสฺส อตฺตภาโว วิโรจตี"ติ สุตฺวา "จงฺกมนฺทานิสฺส หาเรสฺสามี"ติ จินฺเตตฺวา "มยฺหํ ปิตุ ปาเท ขุเรน ผาเลตฺวา โลณเตเลน มกฺเขตฺวา ขทิรงฺคาเรหิ วีตจฺจิเตหิ ปจถา"ติ นฺหาปิเต เปเสสิ. ราชา เต ทิสฺวา "นูน มยฺหํ ปุตฺโต เกนจิ สญฺญตฺโต ภวิสฺสติ, อิเม มม มสฺสุกรณตฺถายาคตา"ติ จินฺเตสิ. เต คนฺตฺวา วนฺทิตฺวา อฏฺฐํสุ. กสฺมา อาคตตฺถาติ จ ปุฏฺฐา ตํ สาสนํ อาโรเจสุํ. ตุมฺหากํ รญฺโญ มนํ กโรถาติ จ วุตฺตา นิสีท เทวาติ วตฺวา จ ราชานํ วนฺทิตฺวา "เทว มยํ รญฺโญ อาณํ กโรม, มา อมฺหากํ กุชฺฌิตฺถ, นยิทํ ตุมฺหาทิสานํ ธมฺมราชูนํ อนุจฺฉวิกนฺ"ติ วตฺวา วามหตฺเถน โคปฺผเก คเหตฺวา ทกฺขิณหตฺเถน ขุรํ คเหตฺวา ปาทตลานิ ผาเลตฺวา โลณเตเลน มกฺเขตฺวา ขทิรงฺคาเรหิ วีตจฺจิเตหิ ปจึสุ. ราชา กิร ปุพฺเพ เจติยงฺคเณ สอุปาหโน อคมาสิ, นิสชฺชตฺถาย ๕- ปญฺญตฺตกฏสารกญฺจ อโธเตหิ ปาเทหิ อกฺกมิ, ตสฺสายํ นิสฺสนฺโทติ วทนฺติ. รญฺโญ พลวเวทนา อุปฺปนฺนา.