โทสินาติ โทสาปคตา, อพฺภา มหิกา ธูโมรโช ๑- ราหูติ อิเมหิ ปญฺจหิ ๒- อุปกฺกิเลเสหิ วิรหิตาติ วุตฺตํ โหติ. ตสฺมา ๓- รมณียาติอาทีนิ ปญฺจ โถมนวจนานิ. สา หิ มหาชนสฺส มนํ รมยตีติ รมณียา. วุตฺตโทสวิมุตฺตาย จนฺทปฺปภาย โอภาสิตตฺตา อติวิย สุรูปาติ อภิรูปา. ทสฺสิตุํ ๔- ยุตฺตาติ ทสฺสนียา. จิตฺตํ ปสาเทตีติ ปาสาทิกา. ทิวสมาสาทีนํ ลกฺขณํ ภวิตุํ ยุตฺตาติ ลกฺขญฺญา.

กํ นุ ขฺวชฺชาติ กํ นุ โข อชฺช. สมณํ วา พฺราหฺมณํ วาติ สมิตปาปตาย สมณํ, พาหิตปาปตาย พฺราหฺมณํ. ยนฺโน ปยิรุปาสโตติ วจนพฺยตฺตโย ๕- เอส, ยํ อมฺหากํ ปญฺหาปุจฺฉนวเสน ปยิรุปาสนฺตานํ มธุรธมฺมํ สุตฺวา จิตฺตํ ปสีเทยฺยาติ อตฺโถ. อิติ ราชา อิมินา สพฺเพนปิ วจเนน โอภาสนิมิตฺตกมฺมํ อกาสิ. กสฺส อกาสีติ? ชีวกสฺส. กิมตฺถํ? ภควโต ทสฺสนตฺถํ. กึ ภควนฺตํ สยํ ทสฺสนาย อุปคนฺตุํ น สกฺโกตีติ? อาม น สกฺโกติ. กสฺมา? มหาปราธตาย.

เตน หิ ภควโต อุปฏฺฐาโก อริยสาวโก อตฺตโน ปิตา มาริโต, เทวทตฺโต จ ตเมว นิสฺสาย ภควโต พหุํ อนตฺถมกาสิ, อิติ มหาปราโธ เอว ๖- ตาย มหาปราธตาย สยํ คนฺตุํ น สกฺโกติ. ชีวโก ปน ภควโต อุปฏฺฐาโก "ตสฺส ปิฏฺฐิจฺฉายาย ภควนฺตํ ปสฺสิสฺสามี"ติ โอภาสนิมิตฺตกมฺมํ อกาสิ. กึ ชีวโก ปน "มยฺหํ อิทํ โอภาสนิมิตฺตกมฺมนฺ"ติ ชานาตีติ? อาม ชานาติ. อถ กสฺมา ตุณฺหี อโหสีติ? วิกฺเขปปจฺเฉทนตฺถํ.

ตสฺมึ ๗- หิ ปริสติ ฉนฺนํ สตฺถารานํ อุปฏฺฐากา พหู สนฺนิปติตา, เต อสิกฺขิตานํ ปยิรุปาสเนน สยํปิ อสิกฺขิตาว. เต มยิ ภควโต คุณกถํ อารทฺเธ อนฺตรนฺตรา อุฏฺฐายุฏฺฐาย อตฺตโน สตฺถารานํ คุณํ กถยิสฺสนฺติ, เอวํ ๘- เม สตฺถุ คุณกถา ปริโยสานํ น คมิสฺสติ. ราชา ปน อิเมสํ กุลุปเก อุปสงฺกมิตฺวา คหิตาสารตฺตา ๙- เตสํ คุณกถาย อนตฺตมโน หุตฺวา มํ ปฏิปุจฺฉิสฺสติ, อถาหํ นิพฺพิกฺเขปํ สตฺถุ คุณํ ๑๐- กเถตฺวา ราชานํ สตฺถุ สนฺติกํ คเหตฺวา คมิสฺสามีติ ชานนฺโตว วิกฺเขปปจฺเฉทนตฺถํ ตุณฺหี อโหสีติ.