[๑๕๕] สญฺชโยติ ตสฺส นามํ. เวลฏฺฐสฺส ปุตฺโตติ เวลฏฺฐปุตฺโต.

[๑๕๖] อมฺหากํ คณฺฐนกิเลโส ปลิพุนฺธนกิเลโส ๒- นตฺถิ, กิเลส- คณฺฐรหิตา ๓- มยนฺติ เอวํวาทิตาย ลทฺธนามวเสน นิคณฺโฐ. นาฏสฺส ปุตฺโตติ นาฏปุตฺโต.

โกมารภจฺจชีวกกถาวณฺณนา

[๑๕๗] อถโข ราชาติ ราชา กิร เตสํ วจนํ สุตฺวา จินฺเตสิ "อหํ ยสฺส ยสฺส วจนํ น โสตุกาโม, โส โส เอวํ ๔- กเถสิ. ยสฺส ปนมฺหิ วจนํ โสตุกาโม, เอส ๕- นาควสํ ปิวิตฺวา ฐิโต สุปณฺโณ วิย ตุณฺหีภูโต, อนตฺโถ วต เม"ติ. อถสฺเสตทโหสิ "ชีวโก อุปสนฺตสฺส พุทฺธสฺส ภควโต อุปฏฺฐาโก, สยํปิ อุปสนฺโต, ตสฺมา วตฺตสมฺปนฺโน ภิกฺขุ วิย ตุณฺหีภูโต นิสินฺโน, น เอส มยิ อกเถนฺเต กเถสฺสติ, หตฺถิมฺหิ โข ปน มทฺทนฺเต หตฺถิสฺเสว ปาโท คเหตพฺโพ"ติ เตน สทฺธึ สยํ มนฺเตตุมารทฺโธ. เตน วุตฺตํ "อถโข ราชา"ติ. ตตฺถ กึ ตุณฺหีติ เกน การเณน ตุณฺหี. อิเมสํ อมจฺจานํ อตฺตโน กุลุปกสมณสฺส วณฺณํ กเถนฺตานํ มุขํ นปฺปโหติ. กึ ยถา เอเตสํ, เอวํ ตว กุลุปกสมโณ นตฺถิ, กึ ตฺวํ ทลิทฺโท, น เต มม ปิตรา อิสฺสริยํ ทินฺนํ, อุทาหุ อสฺสทฺโธติ ปุจฺฉติ.