อหุเทว ภยนฺติ เอตฺถ จิตฺตุตฺราสภยํ ญาณภยํ อารมฺมณภยํ โอตฺตปฺปภยนฺติ จตุพฺพิธํ ภยํ, ตตฺถ "ชาตึ ปฏิจฺจ ภยํ ภยานกนฺติ ๗- อาทินา นเยน วุตฺตํ จิตฺตุตฺราสภยํ นาม. "เตปิ ตถาคตสฺส ธมฺมเทสนํ สุตฺวา เยภุยฺเยน ภยํ สํเวคํ สนฺตาสํ อาปชฺชนฺตี"ติ ๘- เอวมาคตํ ญาณภยํ นาม. "เอตํ นูน ตํ ภยเภรวํ อาคจฺฉตี"ติ ๙- เอตฺถ วุตฺตํ อารมฺมณภยํ นาม.

"ภีรุํ ปสํสนฺติ น หิ ตตฺถ สูรํ

ภยา หิ สนฺโต น กโรนฺติ ปาปนฺ"ติ ๑๐-

อิทํ โอตฺตปฺปภยํ นาม. เตสุ อิธ จิตฺตุตฺราสภยํ, อหุ อโหสีติ อตฺโถ. ฉมฺภิตตฺตนฺติ ฉมฺภิตภาโว, สกลสรีรจลนนฺติ อตฺโถ. โลมหํโสติ โลมหํสนํ, อุทฺธํ ฐิตโลมตาติ อตฺโถ. โส ปนายํ โลมหํโส ธมฺมสฺสวนาทีสุ ปีติอุปฺปตฺติ- กาเล ปีติยาปิ โหติ, ภีรุกชาติกานํ สมฺปหารปิสาจาทิทสฺสเนสุ ภเยนาปิ. อิธ ภยโลมหํโส เวทิตพฺโพ.