ทกฺขิณนฺติ ทกฺขิณตีเร มนุสฺสา กกฺขฬา ทารุณา, เต สนฺธาย "หนนฺโต"ติอาทิมาห. อุตฺตรตีเร สตฺตา สทฺธา โหนฺติ ปสนฺนา พุทฺธมามกา ธมฺมมามกา สํฆมามกา, เต สนฺธาย "ททนฺโต"ติอาทิมาห. ตตฺถ ยชนฺโตติ มหายาคํ กโรนฺโต. ทเมนาติ อินฺทฺริยทเมน, อุโปสถกมฺเมน วา. สํยเมนาติ ๔- สีลสญฺญเมน. สจฺจวชฺเชนาติ สจฺจวจเนน. อาคโมติ อาคมนํ, ปวตฺตีติ อตฺโถ. สพฺพถาปิ ปาปปุญฺญานํ กิริยเมว ปฏิกฺขิปติ.
อมฺพํ ปุฏฺโฐ ลพุชํ พฺยากโรติ นาม, โย "กีทิโส อมฺโพ, กีทิสานิ วา อมฺพสฺส ขนฺธปณฺณปุปฺผผลานี"ติ วุตฺเต "เอทิโส ลพุโช, เอทิสานิ วา ลพุชสฺส ขนฺธปณฺณปุปฺผผลานี"ติ พฺยากโรติ. วิชิเตติ อาณาปวตฺติเทเส. อปสาเทตพฺพนฺติ วิเหเฐตพฺพํ. อนภินนฺทิตฺวาติ "สาธุ สาธู"ติ เอวํ ปสํสํ อกตฺวา. อปฺปฏิกฺโกสิตฺวาติ พาล ทุพฺภาสิตํ ตยา ภาสิตนฺติ เอวํ อปฺปฏิพาหิตฺวา. อนุคฺคณฺหนฺโตติ สารโต ๕- อคฺคณฺหนฺโต. อนิกฺกุชฺเชนฺโตติ สารวเสเนว อิทํ นิสฺสรณํ, อยํ ปรมตฺโถติ หทเย อฏฺฐเปนฺโต. พยญฺชนํ ปน เตน อุคฺคหิตญฺเจว นิกฺกุชฺชิตญฺจ.
@๓ ฉ.ม. กรณการณวเสเนว ๔ ก. สญฺญเมนาติ ๕ ฉ.ม. สารวเสเนว