เอกูนปญฺญาส อาชีวกสเตติ เอกูนปญฺญาส อาชีวกวุตฺติสตานิ. ปริพฺพาชกสเตติ ปริพฺพาชกปพฺพชฺชาสตานิ. นาคาวาสสเตติ นาคมณฺฑลสตานิ. วีเส อินฺทฺริยสเตติ วีสตินฺทฺริยสตานิ. ตึเส นิรยสเตติ ตึส นิรยสตานิ. รโชธาตุโยติ รชโอกิรณฏฺฐานานิ, หตฺถปิฏฺฐิปาทปิฏฺฐาทีนิ สนฺธาย วทติ. สตฺตสญฺญีคพฺภาติ โอฏฺฐโคณคทฺรภอชปสุมิคมหิเส สนฺธาย วทติ. สตฺตอสญฺญีคพฺภาติ สาลิวีหิยวโคธูมกงฺคุวรกกุทฺรูสเก สนฺธาย วทติ. นิคณฺฐิคพฺภาติ คณฺฐิมฺหิ ชาตคพฺภา อุจฺฉุเวฬุนฬาทโย สนฺธาย วทติ. สตฺตเทวาติ พหู เทวา. โส ปน "สตฺตา"ติ วทติ. มนุสฺสาปิ อนนฺตา, โส "สตฺตา"ติ วทติ. สตฺตปิสาจาติ ปิสาจา มหนฺตมหนฺตา "สตฺตา"ติ วทติ. สราติ มหาสรา, กณฺณมุณฺฑกรถการอโนตตฺต- สีหปฺปปาตฉทฺทนฺตมนฺทากินิกุณาลทเห คเหตฺวา วทติ.

ปวุฏาติ ๓- คณฺฐิกา. ปปาตาติ มหาปปาตา. ปปาตสตานีติ ขุทฺทกปปาตสตานิ. สุปินาติ มหาสุปินา. สุปินสตานีติ ขุทฺทกสุปินสตานิ. มหากปฺปิโนติ มหากปฺปานํ. ๔- ตตฺถ เอตฺตกา ๕- มหาสรา วสฺสสเต วสฺสสเต กุสคฺเคน เอกํ อุทกพินฺทุํ นีหริตฺวา สตฺตกฺขตฺตุํ ตสฺมึ สเร นิรุทเก กเต เอโก มหากปฺโปติ วทติ. เอวรูปานํ มหากปฺปานํ จตุราสีติสตสหสฺสานิ เขเปตฺวา พาโล จ ปณฺฑิโต จ ๖- ทุกฺขสฺสนฺตํ กโรนฺตีติ อยมสฺส ลทฺธิ. ปณฺฑิโตปิ กิร อนฺตรา วิสุชฺฌิตุํ น สกฺโกติ, พาโลปิ ตโต อุทฺธํ น คจฺฉติ.

สีเลนาติ อเจลกสีเลน วา อญฺเญน วา เยน เกนจิ. วเตนาติ ตาทิเสเนว วเตน. ตเปนาติ ตโปกมฺเมน. อปริกฺปกํ ปริปาเจติ นาม โย "อหํ