[๑๗๙-๑๘๑] สญฺชยวาโท อมราวิกฺเขเป วุตฺตนโยเอว.

ปฐมสนฺทิฏฺฐิกสามญฺญผลวณฺณนา

[๑๘๒] โสหํ ภนฺเตติ โส อหํ ภนฺเต, วาลุกํ ปีเฬตฺวา เตลํ อลภมาโน วิย ติตฺถิยวาเทสุ สารํ อลภนฺโต ภควนฺตํ ปุจฺฉามีติ อตฺโถ.

[๑๘๓] ยถา เต ขเมยฺยาติ ยถา เต รุจฺเจยฺย. ทาโสติ อนฺโตชาต ธนกฺกีต กรมรานีต สามํทาสพฺยอุปคตานํ อญฺญตโร. กมฺมกาโรติ อนลโส กมฺมกรณสีโลเยว. ทูรโต ทิสฺวา ปฐมเมว อุฏฺฐหตีติ ปุพฺพุฏฺฐายี. เอวํ อุฏฺฐิโต สามิโน อาสนํ ปญฺญเปตฺวา ปาทโธวนาทิกตฺตพฺพกิจฺจํ กตฺวา ปจฺฉา นิปตติ เสยฺยํ กปฺเปตีติ ๑- ปจฺฉานิปาตี. สามิกมฺหิ วา สยนโต อวุฏฺฐิเต ปุพฺเพเยว วุฏฺฐาตีติ ปุพฺพุฏฺฐายี. ปจฺจูสกาลโต ปฏฺฐาย ยาว สามิโน รตฺตึ นิทฺโทกฺกมนํ, ตาว สพฺพกิจฺจานิ กตฺวา ปจฺฉา นิปตติ เสยฺยํ กปฺเปตีติ ปจฺฉานิปาตี. "กึ กโรมิ, กึ กโรมี"ติ เอวํ กึการเมว ปฏิสุณนฺโต วิจรตีติ กึการปฏิสฺสาวี. มนาปํเยว กิริยํ กโรตีติ มนาปจารี. ปิยเมว วทตีติ ปิยวาที. สามิโน ตุฏฺฐปหฏฺฐํ มุขํ อุลฺโลกยมาโน ๒- วิจรตีติ มุขมุลฺโลกิโก.