อปฺปํ วาติ ปริตฺตํ ๒- วา อนฺตมโส ตณฺฑุลนาฬิมตฺตกํปิ. โภคกฺขนฺธนฺติ โภคราสึ. มหนฺตํ วาติ วิปุลํ วา. ยถา หิ มหนฺตํ ปหาย ปพฺพชิตุํ ทุกฺกรํ, เอวํ อปฺปํปีติ ทสฺสนตฺถํ อุภยมาห. ทาสวาเร ปน ยสฺมา ทาโส อตฺตโนปิ อนิสฺสโร, ปเคว โภคานํ. ยํ หิ ตสฺส ธนํ, ตํ สามิกานญฺเญว โหติ, ตสฺมา โภคคฺคหณํ น กตํ. ญาติเยว ญาติปริวฏฺโฏ.

ปณีตตรสามญฺญผลวณฺณนา

[๑๘๙] สกฺกา ปน ภนฺเต อญฺญํปิ ทิฏฺเฐว ธมฺเมติ อิธ "เอวเมวา"ติ น วุตฺตํ. ตํ กสฺมาติ เจ? "เอวเมวา"ติ หิ วุจฺจมาเน ปโหติ ภควา สกลํปิ รตฺตินฺทิวํ ตโต วา ภิยฺโยปิ เอวรูปาหิ อุปมาหิ สามญฺญผลํ ทีเปตุํ. ตตฺถ กิญฺจาปิ เอตสฺส ภควโต วจนสวเน ปริยตฺติ ๓- นาม นตฺถิ, ตถาปิ อตฺโถ ตาทิโสเยว ภวิสฺสตีติ จินฺเตตฺวา อุปริวิเสสํ ปุจฺฉนฺโต "เอวเมวา"ติ อวตฺวา อุตฺตรึ ๔- "อภิกฺกนฺตตรญฺจ ปณีตตรญฺจา"ติ อาห. ตตฺถ อภิกฺกนฺตตรนฺติ อภิมนาปตรํ, อติเสฏฺฐตรนฺติ ๕- อตฺโถ. ปณีตตรนฺติ อุตฺตมตรํ. เตนหีติ อุยฺโยชนฏฺเฐ นิปาโต. สวเน อุยฺโยเชนฺโต หิ นํ เอวมาห. สุณาหีติ ๖- อภิกฺกนฺตตรญฺจ ปณีตตรญฺจ สามญฺญผลํ สุณาหิ.

สาธุกํ มนสิกโรหีติ เอตฺถ ปน สาธุกํ สาธูติ เอกฏฺฐเมตํ. อยํ หิ สาธุสทฺโท ๗- อายาจนสมฺปฏิจฺฉนสมฺปหํสนสุนฺทรทฬฺหีกมฺมาทีสุ ทิสฺสติ. "สาธุ เม ภนฺเต ภควา สงฺขิตฺเตน ธมฺมํ เทเสตู"ติ ๘- อาทีสุ อายาจเน ทิสฺสติ. "สาธุ