สมุฏฺฐาเปติ อตฺตานํ อณุํ อคฺคึว สนฺธมนฺ"ติ. ๒-

ภตฺตเวตนนฺติ เทวสิกํ ภตฺตญฺเจว มาสิกาทิปริพฺพยญฺจ ตสฺส ตสฺส กุลกมฺมสูรภาวานุรูเปน ฐานนฺตรคามนิคมาทิทาเนน สทฺธึ เทตูติ อตฺโถ. สกมฺมปสุตาติ กสิวณิชฺชาทีสุ สเกสุ กมฺเมสุ อุยฺยุตฺตา พฺยาวฏา. ราสิโกติ ธนธญฺญานํ ราสิโก. เขมฏฺฐิตาติ เขเมน ฐิตา อภยา. อกณฺฏกาติ โจรกณฺฏกรหิตา. มุทา โมทมานาติ โมทา โมทมานา. อยเมว วา ปาโฐ, อญฺญมญฺญํ ปมุทิตจิตฺตาติ อธิปฺปาโย. อปารุตฆราติ โจรานํ อภาเวน ทฺวารานิ อสํวริตฺวา วิวฏทฺวาราติ อตฺโถ. เอตทโวจาติ ชนปทสฺส สพฺพากาเรน อิทฺธผีตภาวํ ญตฺวา เอตํ อโวจ.

จตุปริกฺขารวณฺณนา

[๓๓๙] เตนหิ ภวํ ราชาติ พฺราหฺมโณ กิร จินฺเตสิ "อยํ ราชา มหาทานํ ทาตุํ อติวิย อุสฺสาหชาโต. สเจ ปน อตฺตโน อนุยนฺตา ๓- ขตฺติยาทโย อนามนฺเตตฺวา ทสฺสติ, นาสฺส เต อตฺตมนา ภวิสฺสนฺติ, ยถาทานิ ๔- เต อตฺตมนา โหนฺติ, ตถา กริสฺสามี"ติ. "ตสฺมา เตนหิ ภวนฺ"ติ อาทิมาห.