[๓๖๖-๓๗๑] เอกํสภาวิโตติ เอกํสาย เอกโกฏฺฐาสาย ภาวิโต, ทิพฺพานํ วา รูปานํ ทสฺสนตฺถาย, ทิพฺพานํ วา สทฺทานํ สวนตฺถาย ภาวิโตติ อตฺโถ. ติริยนฺติ อนุทิสาย. อุภยํสภาวิโตติ อุภยํสาย อุภยโกฏฺฐาสาย ภาวิโตติ อตฺโถ. อยํ โข มหาลิ เหตูติ อยํ ทิพฺพานํเยว รูปานํ ทสฺสนาย เอกํสภาวิโต สมาธิ เหตุ.
[๓๗๒] อิมมตฺถํ สุตฺวา โส ลิจฺฉวี จินฺเตสิ "อิทํ ทิพฺพโสเตน สทฺทสุณนํ ๓- อิมสฺมึ สาสเน อุตฺตมตฺถภูตํ มญฺเญ, อิมสฺส นูน อตฺถาย เอเต ภิกฺขู ปญฺญาสมฺปิ สฏฺฐิปิ วสฺสานิ อปณฺณกํ พฺรหฺมจริยํ จรนฺติ, ยนฺนูนาหํ ทสพลํ เอตมตฺถํ ปุจฺเฉยฺยนฺ"ติ. ตโต ตมตฺถํ ปุจฺฉนฺโต "เอตาสํ นูน ภนฺเภ"ติ อาทิมาห. สมาธิภาวนานนฺติ เอตฺถ สมาธิเยว สมาธิภาวนา, อุภยํสภาวิตานํ สมาธีนนฺติ อตฺโถ. อถ ยสฺมา สาสนโต พาหิรา เอตา สมาธิภาวนา, น อชฺฌตฺติกา. ตสฺมา ตา ปฏิกฺขิปิตฺวา ยทตฺถํ ภิกฺขู พฺรหฺมจริยํ จรนฺติ, เต ทสฺเสนฺโต ภควา "น โข มหาลี"ติ อาทิมาห.
จตุอริยผลวณฺณนา
[๓๗๓] ติณฺณํ สํโยชนานนฺติ สกฺกายทิฏฺฐิอาทีนํ ติณฺณํ พนฺธนานํ. ตานิ หิ วฏฺฏทุกฺขมเย ๔- รเถ สตฺเต สํโยเชนฺติ, ตสฺมา สํโยชนานีติ วุจฺจนฺติ.