[๔๘๒] น ธํเสมีติ น คุณวินาสเนน ธํเสมิ, สีลเภทํ ปาเปตฺวา อนุปุพฺเพน อุจฺจฏฺฐานโต โอตาเรนฺโต นีจฏฺฐาเน น ฐเปมิ, อถโข อหํ พุทฺธสาสนสฺส วุฑฺฒึ ปจฺจาสึสนฺโต กเถมีติ ทสฺเสติ. ตติยํปิ โขติ ยาวตติยํ พุทฺธานํ กถํ ปฏิพาหิตฺวา กเถตุํ วิสหนฺโต นาม นตฺถิ. อยํ ปน ภควตา สทฺธึ วิสฺสาสิโก วิสฺสาสํ วฑฺเฒตฺวา วลฺลโภ หุตฺวา อตฺถกาโมสฺมีติ ติกฺขตฺตุํ กเถสิ.

อิทฺธิปาฏิหาริยวณฺณนา

[๔๘๓-๔๘๔] อถ ภควา อยํ อุปาสโก มยิ ปฏิพาหนฺเตปิ ปุนฺปฺปุนํ ยาจติเยว. "หนฺทสฺส ปาฏิหาริยกรเณ อาทีนวํ ทสฺเสมี"ติ จินฺเตตฺวา "ตีณิ โข"ติอาทิมาห. ตตฺถ อมาหํ ภิกฺขุนฺติ อมุํ อหํ ภิกฺขุํ. คนฺธารีติ คนฺธาเรน นาม อิสินา กตา, คนฺธารรฏฺเฐ วา อุปฺปนฺนวิชฺชา. ตตฺถ กิร พหู อิสโย วสึสุ, เตสุ เอเกน กตา วิชฺชาติ อธิปฺปาโย. อฏฺฏิยามีติ อฏฺโฏ ปีฬิโต วิย โหมิ. หรายามีติ ลชฺชามิ. ชิคุจฺฉามีติ คูถํ ทิสฺวา วิย ชิคุจฺฉํ อุปฺปาเทมิ.