ฐเปตฺวา จตุโรเปเต นิกาเย ทีฆอาทิเก

ตทญฺญํ พุทฺธวจนํ นิกาโย ขุทฺทโก มโตติ. เอวํ นิกายวเสน ปญฺจวิธํ.

กถํ องฺควเสน นววิธํ? สพฺพเมว หิทํ สุตฺตํ เคยฺยํ เวยฺยากรณํ คาถา อุทานํ อิติวุตฺตกํ ชาตกํ อพฺภูตธมฺมํ เวทลฺลนฺติ นวปฺปเภทํ โหติ.

ตตฺถ อุภโตวิภงฺคนิทฺเทสขนฺธกปริวารา สุตฺตนิปาเต มงฺคลสุตฺต- รตนสุตฺตนาลกสุตฺตตุวฏฺฏกสุตฺตานิ อญฺญํปิ จ สุตฺตนามกํ ตถาคตวจนํ สุตฺตนฺติ เวทิตพฺพํ. สพฺพํปิ สคาถกํ สุตฺตํ เคยฺยนฺติ เวทิตพฺพํ. วิเสเสน สํยุตฺตเก สกโลปิ สคาถกวคฺโค. สกลํ อภิธมฺมปิฏกํ, นิคฺคาถกํ สุตฺตํ, ยํ จ อญฺญํปิ อฏฺฐหิ องฺเคหิ อสงฺคหิตํ พุทฺธวจนํ, ตํ เวยฺยากรณนฺติ เวทิตพฺพํ. ธมฺมปทํ เถรคาถา เถรีคาถา สุตฺตนิปาเต โนสุตฺตนามิกา สุทฺธิกคาถา จ คาถาติ เวทิตพฺพา. โสมนสฺสญาณมยิกคาถาปฏิสํยุตฺตา เทฺวอสีติ สุตฺตนฺตา อุทานนฺติ เวทิตพฺพํ. วุตฺตํ เหตํ ภควตาติ ๑- อาทินยปฺปวตฺตา ทสุตฺตรสตสุตฺตนฺตา อิติวุตตกนฺติ เวทิตพฺพํ. อปณฺณกชาตกาทีนิ อปณฺณกชาตกาทีนิ ปญฺญาสาธิกานิ ปญฺจ ชาตกสตานิ ชาตกนฺติ เวทิตพฺพํ. จตฺตาโรเม ภิกฺขเว อจฺฉริยา อพฺภูตธมฺมา อานนฺเทติ ๒- อาทินยปฺปวตฺตา สพฺเพปิ อจฺฉริยพฺภูตธมฺมปฏิสํยุตฺตา สุตฺตนฺตา อพฺภูตธมฺมนฺติ เวทิตพฺพํ. จูฬเวทลฺลมหาเวทลฺลสมฺมาทิฏฺฐิสกฺกปญฺหสงฺขารภาชนิยมหาปุณฺณมสุตฺตาทโย ๓- สพฺเพปิ เวทญฺจ ตุฏฺฐิญจ ลทฺธา ลทฺธา ปุจฺฉิตสุตฺตนฺตา เวทลฺลนฺติ เวทิตพฺพํ ๔-. เอวํ องฺควเสน นววิธํ.