สุตนฺติ อยํ สุตสทฺโท สอุปสคฺโค จ อนุปสคฺโค จ คมนวิสฺสุตกิลินฺนอุปจิตานุโยคโสตวิญฺเญยฺยโสตทฺวารานุสาร- วิญฺญาตาทิอเนกตฺถปฺปเภโท. ตถา หิสฺส "เสนาย ปสุโต"ติ อาทีสุ คจฺฉนฺโตติ อตฺโถ. "สุตธมฺมสฺส ปสฺสโต"ติ ๓- อาทีสุ วิสฺสุตธมฺมสฺสาติ อตฺโถ. "อวสฺสุตา อวสฺสุตสฺสา"ติ ๔- อาทีสุ กิลินฺนา กิลินฺนสฺสาติ อตฺโถ. "ตุเมฺหหิ ปุญฺญํ ปสุตํ อนปฺปกนฺ"ติ ๕- อาทีสุ อุปจิตนฺติ อตฺโถ. "เย ฌานปสุตา ธีรา"ติ ๖- อาทีสุ ฌานานุยุตฺตาติ อตฺโถ. "ทิฏฺฐํ สุตํ มุตนฺ"ติ ๗- อาทีสุ โสตวิญฺเญยฺยนฺติ อตฺโถ. "สุตธโร สุตสนฺนิจฺจโย"ติ ๘- อาทีสุ โสตทฺวารานุสารวิญฺญาตธโรติ อตฺโถ. อิธ ปนสฺส โสตทฺวารานุสาเรน อุปธาริตนฺติ วา อุปธารณนฺติ วาติ อตฺโถ. เมสทฺทสฺส หิ มยาติ อตฺเถ สติ "เอวํ มยา สุตํ โสตทฺวารานุสาเรน อุปธาริตนฺ"ติ ยุชฺชติ. มมาติ อตฺเถ สติ "เอวํ มม สุตํ ๙- มม โสตทฺวารานุสาเรน อุปธารณนฺ"ติ ยุชฺชติ.

เอวเมเตสุ ตีสุ ปเทสุ เอวนฺติ โสตวิญฺญาณาทิวิญฺญาณกิจฺจนิทสฺสนํ. เมติ วุตฺตวิญฺญาณสมงฺคิปุคฺคลนิทสฺสนํ. สุตนฺติ อสฺสวนภาวปฏิกฺเขปโต อนูนานาธิกาวิปรีตคฺคหณนิทสฺสนํ ๑๐- ตถา เอวนฺติ ตสฺสา โสตทฺวารานุสาเรน ปวตฺตาย วิญฺญาณวีถิยา นานปฺปกาเรน อารมฺมเณ ปวตฺติภาวปฺปกาสนํ. เมติ อตฺตปฺปกาสนํ. สุตนฺติ ธมฺมปฺปกาสนํ. อยํ เหตฺถ สงฺเขโป "นานปฺปกาเรน อารมฺมเณ ปวตฺตาย วิญฺญาณวีถิยา มยา น อญฺญํ กตํ, อิทํ ปน กตํ "อยํ ธมฺโม สุโต"ติ.

ตถา เอวนฺติ นิทฺทิสิตพฺพธมฺมปฺปกาสนํ. เมติ ปุคฺคลปฺปกาสนํ. สุตนฺติ ปุคฺคลกิจฺจปฺปกาสนํ. อิทํ วุตฺตํ โหติ "ยํ สุตฺตํ นิทฺทิสิสฺสามิ, ตํ มยา เอวํ สุตนฺ"ติ.