3. Ambaṭṭhasutta

addhānagamanavaṇṇanā

[254] Evamme sutaṃ .pe. Kosalesūti ambaṭṭhasuttaṃ. Tatrāyaṃ anupubbapadavaṇṇanā. Kosalesūti kosalā nāma janapadino rājakumāRā. Tesaṃ nivāso ekopi janapado ruḷhisaddena "kosalā"ti vuccati, tasmiṃ kosalesu janapade.

Porāṇā panāhu:- yasmā pubbe mahāpanādaṃ rājakumāraṃ nānānāṭakādīni disvā sitamattaṃpi akarontaṃ sutvā rājā āha "yo mama puttaṃ hasāpesi, sabbālaṅkārena naṃ alaṅkaromī"ti. Tato naṅgalānipi chaḍḍetvā māhajanakāye sannipatite manussā atirekāni sattavassāni nānākīḷāyo dassetvāpi taṃ hasāpetuṃ nāsakkhiṃsu. Tato sakko devarājā nāṭakaṃ pesesi, so dibbanāṭakaṃ dassetvā hasāpesi. Atha te manussā attano attano vasanokāsābhimukhāva pakkamiṃsu. Te paṭipathe mittasuhajjādayo disvā paṭisanthāraṃ karontā "kacci bho kusalaṃ, kacci bho kusalan"ti āhaṃsu.