Taṃ sandhāya vuttaṃ "paññatte āsena nisīdī"ti.

Evaṃ nisinno pana jānantoyeva kathāsamuṭṭhāpanatthaṃ bhikkhū pucchi. Te cassa sabbaṃ kathayiṃsu. Tena vuttaṃ "nisajja kho bhagavā"ti ādi. Tattha kāyanutthāti katamāya nu kathāya sannisinnā bhavathāti attho. Kāya nevatthātipi pāli, tassā katamāya nu etthāti attho. Kāya notthātipi pāli, tassāpi purimoyevattho.

Antarā kathāti kammaṭṭhānamanasikārauddesaparipucchādīnaṃ antarā aññā ekā kathā. Vippakatāti mamāgamanapaccayā apariniṭṭhitā sikhaṃ appattā. Tena kiṃ dasseti? "nāhaṃ tumhākaṃ kathābhaṅgatthaṃ āgato, ahaṃ pana sabbaññutāya tumhākaṃ kathaṃ niṭṭhāpetvā matthakappattaṃ katvā dassāmīti āgato"ti nisajjeva sabbaññuppavāraṇaṃ pavāreti. Ayaṃ kho no bhante antarā kathā vippakatā, atha bhagavā anuppattoti etthāpi ayamādhippāyo:- ayaṃ bhante amhākaṃ bhagavato sabbaññutañāṇaṃ ārabbha guṇakathā vippakatā, na rājakathādikā tiracchānakathā, atha bhagavā anuppatto, taṃ no idāni niṭṭhāpetvā desethāti.

Ettāvatā ca yaṃ āyasmatā ānandena kamalakuvalayujjalavimalasādhurasasalilāya pokkharaṇiyā sukhāvataraṇatthaṃ nimmalasilātalaracanavilāsitasobhitaratanasopānaṃ vippakiṇṇamuttādata sadisavālukāpuṇṇa paṇḍarabhūmibhāgaṃ titthaṃ viya, suvibhattabhittivicitravedikāparikkhittassa nakkhattapathaṃ phusitukāmatāya viya, pavijambhita samussayassapāsādavarassa sukhārohaṇatthaṃ dantamayasaṇhamuduphalakakañcanalatāvinaddhamaṇippabhā samudayujjalasobhaṃ sopānaṃ viya, suvaṇṇavalayanūpurādisaṅghaṭṭanasaddasammissita kathitahasitamadhurassaragehajanavicaritassa uḷāraissariyavibhavasobhitassa mahāgharassa sukhappavesanatthaṃ suvaṇṇarajatamaṇimuttāpavāḷādijutivissaravijjotitasuppatiṭṭhitavisāladvārabāhaṃ