@6 Ma.u. 14/86 mahāpuṇṇamasutta. 7 saṃ.sa. 15/246 khu.su. 25/183 āḷavakasutta. Tesaṃ pucchāvasiko nikkhePo.

Yāni ca tāni uppannakāraṇaṃ paṭicca kathitāni. Seyyathīdaṃ? dhammadāyādaṃ Cūḷasīhanādaṃ candūpamaṃ puttamaṃsūpamaṃ dārukkhandhūpamaṃ aggikkhandhūpamaṃ pheṇapiṇḍūpamaṃ pāricchattakūpamanti evamādīni. Tesaṃ atthuppattiko nikkhePo. Evamimesu catūsu nikkhepesu imassa suttassa atthuppattiko nikkhePo. Atthuppattiyā hi idaṃ bhagavatā nikkhittaṃ. Katarāya atthuppattiyā? vaṇṇāvaṇṇe. Ācariyo ratanattayassa avaṇṇaṃ abhāsi, antevāsī vaṇṇaṃ. Iti imaṃ vaṇṇāvaṇṇaṃ atthuppattiṃ katvā desanākusalo bhagavā "mamaṃ vā bhikkhave pare avaṇṇaṃ bhāseyyun"ti desanaṃ ārabhi. Tattha mamanti sāmivacanaṃ, mamāti attho. Vāsaddo vikappattho. Pareti paṭiviruddhā sattā. Tatrāti ye avaṇṇaṃ vadanti, tesu.

"na āghāto"ti ādīhi kiñcāpi tesaṃ bhikkhūnaṃ āghātoyeva natthi, athakho āyatiṃ kulaputtānaṃ īdisesupi ṭhānesu akusaluppattiṃ paṭisedhento dhammanettiṃ ṭhapeti. Tattha āhanati ettha cittanti āghāto, kopassetaṃ adhivacanaṃ. Appatītā honti tena atuṭṭhā asomanassikāti appaccayo, domanassetaṃ adhivacanaṃ. Neva attano na paresaṃ hitaṃ abhirādhayatīti anabhiraddhi, kopassetaṃ adhivacanaṃ. Evamettha dvīhi padehi saṅkhārakkhandho, ekena vedanākkhandhoti dve khandhā vuttā. Tesaṃ vasena sesānaṃpi sampayuttadhammānaṃ karaṇaṃ paṭikkhittameva.

Evaṃ paṭhamena nayena manopadosaṃ nivāretvā dutiyena nayena tatrādīnavaṃ dassento āha "tatra ce tumhe assatha kupitā vā anattamanā vā, tumhaññevassa tena antarāyo"ti. Tattha tatra ce tumhe assathāti tesu avaṇṇabhāsakesu, tasmiṃ vā avaṇṇe tumhe bhaveyyātha ce, yadi bhaveyyāthāti attho. Kupitā kopena, anattamanā domanassena. Tumhaññevassa tena antarāyoti tumhākaṃyeva tena kopena, tāya ca anattamanatāya paṭhamajjhānādīnaṃ antarāyo bhaveyya.