Anatthajanano kodho kodho cittappakopano,

bhayamantarato jātaṃ taṃ jano nāvabujjhatī"ti.

Evaṃ sabbathāpi avaṇṇe manopadosaṃ nisedhetvā idāni paṭipajjitabbākāraṃ dassento "tatra tumhehi abhūtaṃ abhūtato"ti ādimāha.

Tattha tatra tumeehahīti tasmiṃ avaṇṇe tumhehi. Abhūtaṃ abhūtato nibbeṭhetabbanti yaṃ abhūtaṃ, taṃ abhūtabhāveneva apanetabbaṃ. Kathaṃ? "itipetaṃ abhūtan"ti ādinā nayena. Tatrāyaṃ yojanā:- "tumhākaṃ satthā na sabbaññū, dhammo durākkhāto, saṃgho dupaṭipanno"ti ādīni sutvā na tuṇhī bhavitabbaṃ, evaṃ pana vattabbaṃ "itipetaṃ abhūtaṃ, yaṃ tumhehi vuttaṃ, taṃ imināpi kāraṇena abhūtaṃ, imināpi kāraṇena atacchaṃ, natthi cetaṃ amhesu na ca panetaṃ amhesu saṃvijjati, sabbaññūyevā amhākaṃ satthā, svākkhāto dhammo, supaṭipanno saṃgho, tatra idañcidañca kāraṇan"ti. Ettha ca dutiyapadaṃ paṭhamassa, catutthañca tatiyassa vevacananti veditabbaṃ. Idañca avaṇṇeyeva nibbeṭhaṇaṃ kātabbaṃ, na sabbattha. Yadi hi "tvaṃ dussīlo, tavācariyo dussīlo, idañcidañca tayā kataṃ, tavācariyena katan"ti vutte tuṇhī bhūto adhivāseti, āsaṅkanīyo hoti. Tasmā manopadosaṃ akatvā avaṇṇo nibbeṭhetabbo. "oṭṭhosi goṇosī"ti ādinā pana nayena dasahi akkosavatthūhi akkosantaṃ puggalaṃ ajjhupekkhitvā adhivāsanakkhantiyeva tattha kātabbā.