Anatthajanano lobho, lobho cittappakopano,

bhayamantarato jātaṃ, taṃ jano nāvabujjhatī"ti.

Tatiyavāro pana idha anāgatopi atthato āgatoyevāti veditabbo. Yatheva hi kuddho, evaṃ luddhopi atthaṃ na jānātīti.

Paṭipajjitabbākāradassanavāre panāyaṃ yojanā:- "tumhākaṃ satthā sabbaññū arahaṃ sammāsambuddho, dhammo svākkhāto, saṃgho supaṭipanno"ti ādīni sutvā na tuṇhī bhavitabbaṃ, evaṃ pana paṭijānitabbaṃ "itipetaṃ bhūtaṃ, yaṃ tumhehi vuttaṃ, taṃ imināpi kāraṇena bhūtaṃ, imināpi kāraṇena tacchaṃ. So hi bhagavā itipi arahaṃ, itipi sammāsambuddho. Dhammo itipi svākkhāto, itipi sandiṭṭhiko. Saṃgho itipi supaṭipanno, itipi ujupaṭipanno"ti. "tvaṃ sīlavā"ti pucchitenāpi sace sīlavā, "sīlavāhamasmī"ti paṭijānitabbameva. "tvaṃ paṭhamassa jhānassa lābhī .pe. Arahā"ti puṭṭhenāpi sabhāgānaṃ bhikkhūnaṃyeva paṭijānitabbaṃ. Evaṃ hi pāpicchatā ceva parivajjitā hoti, sāsanassa ca amoghatā dīpitā hotīti. Sesaṃ vuttanayeneva veditabbaṃ.