Sīle patiṭṭhāya naro sapañño cittaṃ paññañca bhāvayaṃ,

ātāpī nipako bhikkhu, so imaṃ vijaṭaye jaṭan"ti ca.

"seyyathāpi bhikkhave ye keci me bījagāmabhūtagāmā vuḍḍhiṃ virūḷhiṃ vepullaṃ āpajjanti, sabbe te paṭhaviṃ nissāya paṭhaviyaṃ patiṭṭhāya evamete bījagāmabhūtagāmā vuḍḍhiṃ virūḷhiṃ vepullaṃ āpajjanti, evameva kho bhikkhave bhikkhu sīlaṃ nissāya sīle patiṭṭhāya (ariyaṃ aṭṭhaṅgikaṃ maggaṃ bhāvento, ariyaṃ aṭṭhaṅgikaṃ maggaṃ bahulīkaronto vuḍḍhiṃ virūḷhiṃ vepullaṃ pāpuṇāti dhammesu. .pe. Seyyathāpi bhikkhave himavantaṃ .pe.) satta bojjhaṅge bhāvento, satta bojjhaṅge bahulīkaronto mahattaṃ vā vepullattaṃ vā pāpuṇāti dhammesū"ti ca evaṃ aññānipi anekāni suttāni daṭṭhabbāni. Evamanekesu suttasatesu sīlaṃ mahantameva katvā kathitaṃ. Taṃ kasmā imasmiṃ ṭhāne "appamattakan"ti āhāti? upariguṇe upanidhāya. Sīlaṃ hi samādhiṃ na pāpuṇāti, samādhi paññaṃ na pāpuṇāti, tasmā uparimaṃ uparimaṃ upanidhāya heṭṭhimaṃ oramattakaṃ nāma hoti.

Kathaṃ sīlaṃ samādhiṃ na pāpuṇāti? bhagavāhi abhisambodhito sattame Saṃvacchare sāvatthīnagaradvāre gaṇḍambarukkhamūle dvādasayojane ratanamaṇḍape yojanappamāṇe ratanapallaṅke nisīditvā tiyojanike dibbasetacchatte dhāriyamāne dvādasayojanāya parisāya attādānaparidīpanaṃ titthiyamaddanaṃ "uparimakāyato aggikkhandho pavattati, heṭṭhimakāyato udakadhārā pavattati .pe. Ekekalomakūpato aggikkhandho pavattati ekekalomakūpato udakadhārā pavattati, channaṃ vaṇṇānan"ti ādinayappavattaṃ yamakapāṭihāriyaṃ dasseti. Tassa suvaṇṇavaṇṇasarīrato suvaṇṇavaṇṇā rasmiyo uggantvā yāva bhavaggā gacchanti, sakaladasasahassacakkavāḷassa alaṅkaraṇakālo viya hoti dutiyā dutiyā rasmiyo purimāya purimāya yamakayamakā viya ekakkhaṇe viya pavattanti.