So hi puthūnaṃ nānappakārānaṃ kilesādīnaṃ jananādīhi kāraṇehi puthujjano. yathāha:-

"puthū kilese janentīti puthujjanā, puthū avihatasakkāyadiṭṭhikāti puthujjanā, puthū satthārānaṃ mukhullokikāti puthujjanā, puthū sabbagatīhi avuṭṭhitāti puthujjanā, puthū nānābhisaṅkhāre abhisaṅkharontīti puthujjanā, puthū nānāoghehi

Vuyhanti, puthū nānāsantāpehi santappanti, puthū nānāpariḷāhehi pariḍayhanti, puthū pañcasu kāmaguṇesu rattā giddhā gadhitā mucchitā ajjhosannā laggā laggitā palibuddhāti puthujjanā, puthū pañcahi nīvaraṇehi āvutā nivutā ophuṭā pihitā paṭicchannā paṭikujjitāti puthujjanā"ti.

Puthūnaṃ vā gaṇanapathamatītānaṃ ariyadhammaparammukhānaṃ nīcadhammasamācārānaṃ janānaṃ antogadhattātipi puthujjanā, puthuvā ayaṃ visuṃyeva saṅkhayaṃ gato, visaṃsaṭṭho sīlasutādiguṇayuttehi ariyehi janehītipi puthujjanoti.