@5 cha.ma;i. yāvade 6 suttanta. 8/152 jhānābhiññasutta 7 cha.ma;i. āṇaṇyaṃ Nanu maṃ bhagavā rājā viya sakakavacaissariyānuppadānena attano kulavaṃsappatiṭṭhāpakaṃ puttaṃ `saddhammavaṃsappatiṭṭhāpako me ayaṃ bhavissatī'ti mantvā iminā asādhāraṇena anuggahena anuggahesi, imāya ca uḷārāya pasaṃsāya pasaṃsī"ti cintayanto dhammavinayasaṅgāyanatthaṃ bhikkhūnaṃ ussāhaṃ janesi. Yathāha:-

"atha kho āyasmā mahākassasapo bhikkhū āmantesi `ekamidāhaṃ āvuso samayaṃ pāvāya kusināraṃ addhānamaggapaṭipanno mahatā bhikkhusaṃghena saddhiṃ pañcamattehi bhikkhusatehī"ti sabbaṃ subhaddakaṇḍaṃ vitthārato veditabbaṃ. Atthaṃ panassa mahāparinibbānāvasāne āgataṭṭhāneyeva kathayissāma.

Tato paraṃ āha:-

"handa mayaṃ āvuso dhammañca vinayañca saṅgāyāma, pure adhammo dippati, dhammo paṭibāhīyati, pure avinayo dippati, vinayo paṭibāhīyati, pure adhammavādino balavanto honti, dhammavādino dubbalā honti, pure avinayavādino balavanto honti, vinayavādino dubbalā hontī"ti.