Katamā diṭṭhasaṃsandanāpucchā. Pakatiyā lakkhaṇaṃ ñātaṃ hoti diṭṭhaṃ tulitaṃ tīritaṃ vibhūtaṃ vibhāvitaṃ, tassa aññehi paṇḍitehi saddhiṃ saṃsandanatthāya pañhaṃ pucchati, ayaṃ diṭṭhasaṃsandanāpucchā.

Katamā vimaticchedanāpucchā. Pakatiyā saṃsayaṃ pakkhanto hoti vimatiṃ pakkhanto dveḷhakajāto "evaṃ nukho, na nukho, kinnukho, kathaṃ nukho"ti so vimaticchedanatthāya pañhaṃ pucchati, ayaṃ vimaticchedanāpacchā.

Katamā anumatipucchā. Bhagavā bhikkhūnaṃ anumatiyā pañhaṃ pucchati"taṃ kiṃ maññatha bhikkhave rūpaṃ `niccaṃ vā aniccaṃ vā'ti aniccaṃ bhante. Yampanāniccaṃ, `dukkhaṃ vā taṃ sukhaṃ vā'ti. Dukkhaṃ bhante"ti. Sabbaṃ vattabbaṃ, ayaṃ anumatipucchā.

Katamā kathetukamyatāpucchā. Bhagavā bhikkhūnaṃ kathetukamyatāya pañhaṃ pucchati. "cattārome bhikkhave satipaṭṭhānā. Katame cattāro .pe. aṭṭhime bhikkhave maggaṅgā. Katame aṭṭhā"ti, ayaṃ kathetukamyatāpucchā.