@2 cha.Ma.i. vaṇṇaṃ 3 cha.Ma. parasaṃharaṇaṃ 4 sī, tasmiṃ pana

Tassa pañca sambhārā honti:- parapariggahitaṃ, parapariggahitasaññitā, theyyacittaṃ, upakkamo, tena haraṇanti. cha payogā:- sāhatthikādayova. Te ca kho yathānurūpaṃ theyyāvahāro paseyhāvahāro paṭicchannāvahāro parikappāvahāro kusāvahāroti imesaṃ avahārānaṃ vasena pavattāti ayamettha saṅkhePo. Vitthāro pana samantapāsādikāyaṃ vutto.

Dinnameva ādiyatīti dinnādāyī. Cittenapi dinnameva paṭikaṅkhatīti dinnapāṭikaṅkhī. Thenetīti theno. Na theno atheno, tena. athenattāyeva sucibhūtena. Attanāti attabhāvena, athenaṃ sucibhūtaṃ attānaṃ katvā viharatīti vuttaṃ hoti. Sesaṃ paṭhamasikkhāpade vuttanayeneva yojetabbaṃ. Yathāpidha, evaṃ sabbattha.

Abrahmacariyanti aseṭṭhacariyaṃ. Brahmaṃ seṭṭhaṃ ācāraṃ caratīti brahmacārī. Ārācārīti abrahmacariyato dūracārī. Methunāti rāgapariyuṭṭhānavasena sadisattā "methunakā"ti laddhavohārehi paṭisevitabbato methunāti saṅkhyaṃ gatā asaddhammā. Gāmadhammāti gāmavāsīnaṃ dhammā.