Yadi evaṃ sekkhopi samāno dhammasaṅgītiyā bahukārattā therena uccinitabbo assa, atha kasmā na uccinitoti? parūpavādavivajjanato. Thero hi āyasmante ānande ativiya vissattho ahosi, tathā hi naṃ sirasmiṃ palitesu jātesupi "na vāyaṃ kumārako mattamaññāsī"ti kumārakavādena ovadati. Sakyakulappasuto cāyasmā tathāgatassa bhātā cūḷapitu putto. Tattha keci bhikkhū chandāgamanaṃ viya maññamānā "bahū asekkhapaṭisambhidappatte bhikkhū ṭhapetvā ānandaṃ sekkhapaṭisambhidap- pattaṃ thero uccinī"ti upavadeyyuṃ, taṃ parūpavādaṃ parivajjanto "ānandaṃ vinā dhammasaṅgīti na sakkā kātuṃ, bhikkhūnaṃyeva naṃ anumatiyā gahessāmī"ti na uccini.

Atha sayameva bhikkhū ānandassatthāya theraṃ yāciṃsu. Yathāha:-

"bhikkhū āyasmantaṃ mahākassapaṃ etadavocuṃ `ayaṃ bhante āyasmā ānando kiñcāpi sekkho, abhabbo chandā dosā bhayā mohā agatiṃ gantuṃ, bahu cānena bhagavato santike dhammo ca vinayo ca pariyatto, tenahi bhante thero āyasmantaṃpi ānandaṃ uccinatū"ti. Atha kho āyasmā mahākassapo āyasmantaṃpi ānandaṃ uccinī"ti.