Itthīkathāpi vaṇṇasaṇṭhānādīni paṭicca assādavasena na vaṭṭati, "saddhā pasannā khayavayaṃ gatā"ti evameva vaṭṭati. Sūrakathāpi "nandamitto nāma yodho sūro ahosī"ti assādavasena na vaṭṭati. "saddho ahosi khayaṃ gato"ti evameva vaṭṭati. Visikhākathāpi "asukā visikhā suniviṭṭhā dunniviṭṭhā sūrā samatthā"ti assādavasena na vaṭṭati. "saddhā pasannā khayavayaṃ gatā"ti evameva vaṭṭati.

Kumbhaṭṭhānakathāti udakaṭṭhānakathā, udakatitthakathāti vuccati, kumbhadāsīkathā vā, sāpi "pāsādikā naccituṃ gāyituṃ chekā"ti assādavasena na vaṭṭati. "saddhā pasannā"ti ādinā nayeneva vaṭṭati. Pubbapetakathāti atītañātikathā. Tattha tattha vattamānañātikathāsadiso ca vinicchayo.

Nānattakathāti purimapacchimakathāhi vimuttā avasesā nānāsabhāvā niratthakakathā. Lokakkhāyikāti "ayaṃ loko kena nimmito? asukena nāma nimmito. Kāko seto aṭṭhīnaṃ setattā. Balākā rattā lohitassa rattattā"ti evamādikā lokāyatavitaṇḍasallāpakathā.