[28] Evaṃ brahmadattena vuttavaṇṇassa anusandhivasena tividhaṃ sīlaṃ vitthāretvā idāni bhikkhusaṃghena vuttavaṇṇassa anusandhivasena "atthi bhikkhave aññeva dhammā gambhīrā duddasā"ti ādinā nayena suññatāppakāsanaṃ ārabhi. Tattha dhammāti guṇe desanāyaṃ pariyattiyaṃ nissatteti evamādīsu dhammasaddo vattati.

"nahi dhammo adhammo ca ubho samavipākino

adhammo nirayaṃ neti, dhammo pāpeti suggatin"ti

ādīsu hi guṇe dhammasaddo. "dhammaṃ vo bhikkhave desissāmi ādikalyāṇan"ti ādīsu desanāyaṃ. "idha bhikkhu dhammaṃ pariyāpuṇāti suttaṃ geyyan"ti ādīsu pariyattiyaṃ. "tasmiṃ kho pana samaye dhammā honti, khandhā hontī"ti ādīsu nissatte. Idha pana guṇe vattati. Tasmā "atthi bhikkhave aññeva tathāgatassa guṇā"ti evamettha attho daṭṭhabbo.