[35] Etesaṃ vā aññatarenāti etesaṃyeva catunnaṃ vatthūnaṃ aññatarena ekena vā dvīhi vā tīhi vā. Natthi ito bahiddhāti imehi pana vatthūhi bahi aññaṃ ekaṃ kāraṇampi sassatapaññattiyā natthīti appaṭivattiyaṃ sīhanādaṃ nadati.

[36] Tayidaṃ bhikkhave tathāgato pajānātīti bhikkhave taṃ idaṃ catubbidhaṃpi diṭṭhigataṃ tathāgato nānappakārato jānāti. Tato taṃ pajānanākāraṃ dassento "ime diṭaṭhiṭṭhānā"ti ādimāha, tattha diṭṭhiyova diṭṭhiṭṭhānā nāma. Apica diṭṭhīnaṃ kāraṇampi diṭṭhiṭṭhānameva. Yathāha: "katamāni aṭṭha diṭṭhiṭṭhānāni? khandhāpi diṭṭhiṭṭhānaṃ, avijjāpi. Phassopi. Saññāpi. Vitakkopi. Ayonisomanasikāropi. Pāpamittopi. Paratoghosopi diṭṭhiṭṭhānaṃ. Khandhā hetu khandhā paccayo diṭṭhiṭṭhānaṃ uppādāya samuṭṭhānaṭṭhena, evaṃ khandhāpi diṭṭhiṭṭhānaṃ. Avijjā hetu .pe. Pāpamitto hetu .pe. Paratoghoso hetu paratoghoso paccayo diṭṭhiṭṭhānaṃ uppādāya samuṭṭhānaṭṭhena, evaṃpi paratoghoso diṭṭhiṭṭhānan"ti evaṃ gahitāti diṭṭhisaṅkhātā tāva diṭṭhiṭṭhānā "sassato attā ca loko cā"ti evaṃ gahitā ādinnā, pavattitāti

Evaṃ parāmaṭaṭhāti nirāsaṅkacittatāya punappunaṃ āmaṭṭhā parāmaṭṭhā, "idameva saccaṃ, moghamaññan"ti pariniṭṭhāpitā. Kāraṇasaṅkhātā pana diṭṭhiṭṭhānā yathā gayhamānā diṭṭhiyo samuṭṭhāpenti, evaṃ ārammaṇavasena ca pavattanavasena ca āsevanavasena ca gahitā anādīnavadassitāya punappunaṃ gahaṇavasena parāmaṭṭhā. Evaṃ gatikāti evaṃ nirayatiracchānapetavisayagatīnaṃ aññataragatikā. "evaṃ abhisamparāyā"ti idaṃ purimapadasseva vevacanaṃ, evaṃ idhaparalokāti vuttaṃ hoti.

Tañca tathāgato pajānātīti na kevalañca tathāgato sakāraṇaṃ sagatikaṃ diṭṭhigatameva pajānāti, athakho tañca sabbaṃ pajānāti, tato ca uttaritaraṃ sīlañceva samādhiñca sabbaññutañāṇañca pajānāti. Tañca pajānaṃ na parāmasatīti tañca evaṃvidhaṃ anuttaraṃ visesaṃ pajānantopi "ahaṃ pajānāmī"ti taṇhādiṭṭhimānaparāmāsavasena tañca na parāmasati. Aparāmasato cassa paccattañceva nibbuti viditāti evaṃ aparāmasato cassa aparāmāsapaccayā sayameva attanāyeva tesaṃ parāmāsakilesānaṃ nibbuti viditā, pākaṭaṃ bhikkhave tathāgatassa nibbānanti dasseti.