Paritassitavipphanditavāravaṇṇanā

[105-117] Idāni mariyādāvibhāgadassanatthaṃ tatra "bhikkhave"ti ādikā desanā āraddhā. Tadapi tesaṃ bhavataṃ samaṇabrāhmaṇānaṃ ajānataṃ apassataṃ vedayitaṃ taṇhāgatānaṃ paritassitaṃ vipphanditamevāti yena diṭṭhiassādena diṭṭhisukhena diṭṭhivedayitena te somanassajātā sassataṃ attānañca lokañca paññapenti catūhi vatthūhi, tadapi tesaṃ bhavantānaṃ samaṇabrāhmaṇānaṃ yathābhūtaṃ dhammānaṃ sabhāvaṃ ajānantānaṃ apassantānaṃ vedayitaṃ taṇhāgatānaṃ kevalaṃ taṇhāgatānaṃyeva taṃ vedayitaṃ, tañca kho panetaṃ paritassitaṃ vipphanditameva. Diṭṭhisaṅkhātena ceva taṇhāsaṅkhātena ca paritassitena vipphanditameva calitameva kappitameva. Thusarāsimhi nikhātakhāṇusadisaṃ na sotāpannassa dassanamiva niccalanti dasseti. Eseva nayo ekaccasassatavādādīsupi.

Phassapaccayavāravaṇṇanā

[118-130] Puna "tatra bhikkhave ye te samaṇabrāhmaṇā sassatavādā"ti ādi paramparapaccayadassanatthaṃ āraddhaṃ. Tattha tadapi phassapaccayāti yena diṭṭhiassādena diṭṭhisukhena diṭṭhivedayitena te somanassajātā sassataṃ attānañca lokañca paññapenti catūhi vatthūhi, tadapi taṇhādiṭṭhiparipphanditaṃ vedayitaṃ phassapaccayāti dasseti. Esa nayo sabbattha.