Jīvakassa komārabhaccassa ambavaneti idamassa yaṃ gocaragāmaṃ upanissāya viharati, tassa samīpanivāsanaṭṭhānaparidīpanaṃ. Tasmā rājagahe viharati jīvakassa komārabhaccassa ambavaneti rājagahasamīpe jīvakassa komārabhaccassa ambavane viharatīti evamettha attho veditabbo. Samīpatthe hi etaṃ bhummavacanaṃ. Tattha jīvatīti jīvako, kumārena bhatoti komārabhacco. Yathāha "kiṃ bhaṇe etaṃ kākehi samparikiṇṇanti? dārako devāti. Jīvati bhaṇeti? jīvati devāti. Tenahi bhaṇe taṃ dārakaṃ amhākaṃ antepuraṃ netvā dhātīnaṃ detha posetunti. Tassa jīvatīti jīvakoti nāmaṃ akaṃsu. Kumārena posāpitoti komārabhaccoti nāmaṃ akaṃsū"ti ayamettha saṅkhePo. Vitthārena pana jīvakavatthu khandhake āgatameva. Vinicchayakathāpissa samantapāsādikāya vinayaṭṭhakathāyaṃ vuttā.

Ayaṃ pana jīvako ekasmiṃ samaye bhagavato dosābhisannaṃ kāyaṃ virecetvā sīveyyakaṃ dussayugaṃ datvā vatthānumodanāpariyosāne sotāpattiphale patiṭṭhāya cintesi "mayā divasassa dvittikkhattuṃ buddhupaṭṭhānaṃ gantabbaṃ, idañca gijjhakūṭaṃ veḷuvanaṃ atidūre, mayhampana uyyānaṃ ambavanaṃ āsannataraṃ, yannūnāhaṃ ettha bhagavato vihāraṃ kāreyyan"ti so tasmiṃ ambavane rattiṭṭhānadivāṭṭhānaleṇakuṭi- maṇḍapādīni sampādetvā bhagavato anucchavikaṃ gandhakuṭiṃ kārāpetvā ambavanaṃ aṭṭhārasahatthubbedhena tambapaṭavaṇṇena pākārena parikkhipāpetvā buddhappamukhaṃ bhikkhusaṃghaṃ sacīvarabhattena santappetvā dakkhiṇodakaṃ pātetvā vihāraṃ niyyādesi. Taṃ sandhāya vuttaṃ "jīvakassa komārabhaccassa ambavane"ti.

@4 ayaṃ pāṭho cha.Ma.,Sī.,i. potthakesu na dissati. 5 cha.Ma.,i. niyyātesi