So "mayhaṃ manoratho nipphanno"ti devadattassa ārocesi. Tato naṃ so āha "tvaṃ siṅgālaṃ anto karitvā bheripariyonaddhapuriso viya `sukiccakārimhī'ti maññasi katipāheneva te pitā tayā kataṃ avamānaṃ cintetvā sayameva rājā bhavissatī"ti. Atha bhante kiṃ karomīti? mūlaghaccaṃ ghātehīti. Nanu bhante mayhaṃ pitā na satthavajjhoti? āhārupacchedena naṃ mārehīti. So pitaraṃ tāpanagehe pakkhipāpesi. Tāpanagehaṃ nāma kammakaraṇatthāya katadhūmagharaṃ. "mama mātaraṃ ṭhapetvā aññassa daṭṭhuṃ mā dethā"ti āha. Devī suvaṇṇasarake bhattaṃ pakkhipitvā ucchaṅgenādāya pavisati. Rājā taṃ bhuñjitvā yāpeti. So "mayhaṃ pitā kathaṃ yāpetī"ti pucchitvā taṃ pavattiṃ sutvā "mayhaṃ mātu ucchaṅge katvā pavisituṃ mā dethā"ti āha. Tato paṭṭhāya devī moḷiyaṃ pakkhipitvā pavisati. Tampi sutvā
@3 Ma. mantayiṃsu 4 i. mūsikaṃ 5 ka. mūlacchaṃ, Ma. mūlachejjaṃ 6 cha. ucchaṅgaṃ "moḷiṃ bandhitvā pavisituṃ mā dethā"ti āha. Tato suvaṇṇapādukāsu bhattaṃ ṭhapetvā pidahitvā pādukā āruyha pavisati. Rājā tena yāpeti. Puna "kathaṃ yāpetī"ti pucchitvā tamatthaṃ sutvā "pādukā āruyha pavisitumpi mā dethā"ti āha. Tato paṭṭhāya devī gandhodakena nhāyitvā sarīraṃ catumadhurena makkhetvā pārupitvā pavisati. Rājā tassā sarīraṃ lehitvā yāpeti. Puna pucchitvā taṃ pavattiṃ sutvā "ito paṭṭhāya mayhaṃ mātu pavesanaṃ nivārethā"ti āha. Devī dvāramūle ṭhatvā "sāmi bimbisāra etaṃ daharakāle māretuṃ na adāsi, attano sattuṃ attanāva posesi, idandāni te pacchimadassanaṃ, nāhaṃ ito paṭṭhāya tumhe passituṃ labhāmi, sace mayhaṃ doso atthi, khamatha devā"ti roditvā kanditvā nivatti.
Tato paṭṭhāya rañño āhāro natthi. Rājā maggaphalasukhena caṅkamena yāpeti. Ativiya cassa attabhāvo virocati. So "kathampi me bhaṇe pitā yāpetī"ti pucchitvā "caṅkamena deva yāpeti, ativiya cassa attabhāvo virocatī"ti sutvā "caṅkamandānissa hāressāmī"ti cintetvā "mayhaṃ pitu pāde khurena phāletvā loṇatelena makkhetvā khadiraṅgārehi vītaccitehi pacathā"ti nhāpite pesesi. Rājā te disvā "nūna mayhaṃ putto kenaci saññatto bhavissati, ime mama massukaraṇatthāyāgatā"ti cintesi. Te gantvā vanditvā aṭṭhaṃsu. Kasmā āgatatthāti ca puṭṭhā taṃ sāsanaṃ ārocesuṃ. Tumhākaṃ rañño manaṃ karothāti ca vuttā nisīda devāti vatvā ca rājānaṃ vanditvā "deva mayaṃ rañño āṇaṃ karoma, mā amhākaṃ kujjhittha, nayidaṃ tumhādisānaṃ dhammarājūnaṃ anucchavikan"ti vatvā vāmahatthena gopphake gahetvā dakkhiṇahatthena khuraṃ gahetvā pādatalāni phāletvā loṇatelena makkhetvā khadiraṅgārehi vītaccitehi paciṃsu. Rājā kira pubbe cetiyaṅgaṇe saupāhano agamāsi, nisajjatthāya paññattakaṭasārakañca adhotehi pādehi akkami, tassāyaṃ nissandoti vadanti. Rañño balavavedanā uppannā.