@4 Ma. caṅkameneva 5 cha.Ma. nisajjanatthāya So "aho buddho, aho dhammo, aho saṃgho"ti anussarantoyeva cetiyaṅgaṇe khittamālā viya milāyitvā cātummahārājikadevaloke vessavaṇassa paricārako janavasabho nāma yakkho hutvā nibbatti.

Tandivasameva ca ajātasattussa putto jāto, puttassa jātabhāvañca pitu matabhāvañca nivedetuṃ dve lekhā ekakkhaṇeyeva āgatā. Amaccā "paṭhamaṃ puttassa jātabhāvaṃ ārocessāmā"ti taṃ lekhaṃ rañño hatthe ṭhapesuṃ. Rañño taṃkhaṇaññeva puttasineho uppajjitvā sakalasarīraṃ khobhetvā aṭṭhimiñjaṃ āhacca aṭṭhāsi. Tasmiṃ khaṇe pitu guṇaṃ aññāsi "mayi jātepi mayhaṃ pitu evameva sineho uppanno"ti so "gacchatha bhaṇe, mayhaṃ pitaraṃ vissajjethā"ti āha. Kiṃ vissajjāpetha devāti itaraṃ lekhaṃ hatthe ṭhapayiṃsu.

So tampavattiṃ sutvā rodamāno mātu samīpaṃ gantvā "ahosi nukho amma mayhaṃ pitu mayi jāte sineho"ti. Sā āha `bālaputta kiṃ vadesi, tava daharakāle aṅguliyā piḷakā uṭṭhahi, atha taṃ rodamānaṃ saññāpetuṃ asakkontā taṃ gahetvā vinicchayaṭṭhāne nisinnassa tava pitu santikaṃ agamaṃsu. Pitā te aṅguliṃ mukhe ṭhapesi, piḷakā mukheyeva bhijji. Atha kho pitā tava sinehena taṃ lohitamissakaṃ pubbaṃ anuṭṭhahitvāva ajjhohari. Evarūpo te pitu sineho"ti. So roditvā paridevitvā pitu sarīrakiccaṃ akāsi.