@9 cha.Ma., i. udāhāraṃ

Dosināti dosāpagatā, abbhā mahikā dhūmorajo rāhūti imehi pañcahi upakkilesehi virahitāti vuttaṃ hoti. Tasmā ramaṇīyātiādīni pañca thomanavacanāni. Sā hi mahājanassa manaṃ ramayatīti ramaṇīyā. Vuttadosavimuttāya candappabhāya obhāsitattā ativiya surūpāti abhirūpā. Dassituṃ yuttāti dassanīyā. Cittaṃ pasādetīti pāsādikā. Divasamāsādīnaṃ lakkhaṇaṃ bhavituṃ yuttāti lakkhaññā.

Kaṃ nu khvajjāti kaṃ nu kho ajja. Samaṇaṃ vā brāhmaṇaṃ vāti samitapāpatāya samaṇaṃ, bāhitapāpatāya brāhmaṇaṃ. Yanno payirupāsatoti vacanabyattayo esa, yaṃ amhākaṃ pañhāpucchanavasena payirupāsantānaṃ madhuradhammaṃ sutvā cittaṃ pasīdeyyāti attho. Iti rājā iminā sabbenapi vacanena obhāsanimittakammaṃ akāsi. Kassa akāsīti? jīvakassa. Kimatthaṃ? bhagavato dassanatthaṃ. Kiṃ bhagavantaṃ sayaṃ dassanāya upagantuṃ na sakkotīti? āma na sakkoti. Kasmā? mahāparādhatāya.

Tena hi bhagavato upaṭṭhāko ariyasāvako attano pitā mārito, devadatto ca tameva nissāya bhagavato bahuṃ anatthamakāsi, iti mahāparādho eva tāya mahāparādhatāya sayaṃ gantuṃ na sakkoti. Jīvako pana bhagavato upaṭṭhāko "tassa piṭṭhicchāyāya bhagavantaṃ passissāmī"ti obhāsanimittakammaṃ akāsi. Kiṃ jīvako pana "mayhaṃ idaṃ obhāsanimittakamman"ti jānātīti? āma jānāti. Atha kasmā tuṇhī ahosīti? vikkhepapacchedanatthaṃ.