@9 cha.Ma. gahitāsāratāya 10 i. guṇe

Tepi amaccā evaṃ cintesuṃ "ajja rājā pañcahi padehi rattiṃ thometi, addhā kañci samaṇaṃ vā brāhmaṇaṃ vā upasaṅkamitvā pañhaṃ pucchitvā dhammaṃ sotukāmo, yassa cesa dhammaṃ sutvā pasīdissati, tassa ca mahantaṃ sakkāraṃ karissati. Yassa pana kulupakasamaṇo rājakulupako hoti, bhaddaṃ tassā"ti.

[151] Te evaṃ cintetvā "ahaṃ attano kulupakasamaṇassa vaṇṇaṃ vatvā rājānaṃ gahetvā gamissāmi, ahaṃ gamissāmī"ti attano attano kulupakānaṃ vaṇṇaṃ kathetuṃ āraddhā. Tenāha "evaṃ vutte aññataro rājāmaccoti ādi. Tattha pūraṇoti tassa satthupaṭiññassa nāmaṃ. Kassapoti gottaṃ. So kira aññatarassa kulassa ekūnadāsasataṃ pūrayamāno jāto, tenassa "pūraṇo"ti nāmaṃ akaṃsu. Maṅgaladāsattā cassa "dukkaṭan"ti vattā natthi, "akataṃ vā na katan"ti. So kira "kimahaṃ ettha vasāmī"ti palāyi. Athassa corā vatthāni acchindiṃsu, so paṇṇena vā tiṇena vā paṭicchādetuṃpi ajānanto jātarūpeneva ekaṃ gāmaṃ pāvisi. Manussā naṃ disvā "ayaṃ samaṇo arahā appiccho, natthi iminā sadiso"ti pūvabhattādīni gahetvā upasaṅkamanti. So "mayhaṃ sāṭakaṃ anivatthabhāvena idaṃ uppannan"ti tato paṭṭhāya sāṭakaṃ labhitvāpi na nivāsesi, tadeva pabbajjaṃ aggahesi. Tassa santike aññepi aññepīti pañcasatā manussā anupabbajiṃsu. Taṃ sandhāyāha "pūraṇo kassapo"ti.

Pabbajitasamūhasaṅkhāto saṃgho assa atthīti saṃghī. Sveva gaṇo assa atthīti gaṇī. Ācārasikkhāpanavasena tassa gaṇassa ācariyoti gaṇācariyo. Ñātoti paññāto pākaṭo. "appiccho santuṭṭho, appicchatāya vatthaṃpi na nivāsesī"ti evaṃ samuggato yaso assa atthīti yasasSī. Titthakaroti laddhikaro. Sādhusammatoti ayaṃ sādhu sundaro sappurisoti evaṃ sammato. Bahujanassāti assutavato andhabāla- puthujjanassa. Pabbajitato paṭṭhāya atikkantā bahū rattiyo jānātīti rattaññū. Ciraṃ pabbajitassa assāti cirapabbajito, acirapabbajitassa hi kathā okappanīyā na