@4 visuddhi. 1/253 chaanussatiniddesa. 5 cha.Ma. vissatthaṃ Pana velāya mayhaṃ dasabalassa santikaṃ gacchato na añño koci khippaṃ yānāni yojetuṃ sakkhissati aññatra jīvakā"ti cintetvā "tenahi samma jīvaka hatthiyānāni kappāpehī"ti āha.

Tattha tenahīti uyyojanatthe nipāto, gaccha samma jīvakāti vuttaṃ hoti. Hatthiyānānīti anekesu assarathādīsu yānesu vijjamānesupi hatthiyānaṃ uttamaṃ, uttamassa santikaṃ uttamayāneneva gantabbanti ca, assayānarathayānāni hi sasaddāni, dūratova tesaṃ saddo suyyati, hatthiyānassa padānupadaṃ gacchantāpi saddaṃ na suṇanti, nibbutassa kho pana bhagavato santike nibbuteheva yānehi gantabbanti ca cintayitvā "hatthiyānānī"ti āha.

Pañcamattāni hatthinikāsatānīti pañca kareṇusatāni. Kappāpetvāti ārohanasajjanaṃ kāretvā. Ārohaṇīyanti ārohaṇayoggaṃ, upaguyhanti attho. Kimpanesa raññā vuttaṃ akāsi, avuttanti? avuttaṃ. Kasmā? paṇḍitatāya. Evaṃ Kirassa ahosi:- rājā "imāya velāya gacchāmī"ti vadati, rājāno ca nāma bahupaccatthikā. Sace antarāmagge koci antarāyo hoti, mamampi garahissanti "jīvakopi `rājā me kathaṃ gaṇhātī'ti akālepi rājānaṃ gahetvā nikkhamatī"ti bhagavantampi garahissanti "samaṇo gotamo `mayhaṃ kathā vattatī'ti kālaṃ asallakkhetvā dhammaṃ kathetī"ti. Tasmā yathā neva mayhaṃ, na bhagavato garahā uppajjati, rañño ca rakkhā susaṃvihitā hoti, tathā karissāmīti.