Tato thero vinayaṃ pucchanatthāya attanāva attānaṃ sammanni. Upālittheropi vissajjanatthāya sammanni. Tatrāyaṃ pāli:- atha kho āyasmā mahākassapo saṃghaṃ ñāpesi

"suṇātu me āvuso saṃgho, yadi saṃghassa pattakallaṃ, ahaṃ upāliṃ vinayaṃ puccheyyan"ti. Āyasmāpi upāli saṃghaṃ ñāpesi:-

"suṇātu me bhante saṃgho, yadi saṃghassa pattakallaṃ, ahaṃ āyasmatā mahākassapena vinayaṃ puṭṭho vissajjeyyan"ti. Evaṃ attānaṃ sammannitvā āyasmā upāli uṭṭhāyāsanā ekaṃsaṃ cīvaraṃ katvā there bhikkhū vanditvā dhammāsane nisīdi dantakhacitaṃ vījaniṃ gahetvā. Tato mahākassapatthero therāsane nisīditvā āyasmantaṃ upāliṃ vinayaṃ pucchi "paṭhamaṃ āvuso upāli pārājikaṃ kattha paññattan"ti? vesāliyaṃ bhanteti. Kaṃ ārabbhāti? sudinnaṃ kalandaputtaṃ ārabbhāti. Kismiṃ vatthusminti? methunadhammeti.

Atha kho āyasmā mahākassapo āyasmantaṃ upāliṃ paṭhamassa pārājikassa vatthumpi pucchi, nidānampi pucchi, puggalampi pucchi, paññattimpi pucchi, anupaññattimpi pucchi, āpattimpi pucchi, anāpattimpi pucchi, puṭṭho puṭṭho āyasmā upāli vissajjesi.