Tato "itthiyo nissāya purisānaṃ bhayaṃ nāma natthi, sukhaṃ itthīparivuto gamissatī"ti pañca hatthinikāsatāni kappāpetvā pañca itthīsatāni purisavesaṃ gāhāpetvā "asitomarahatthā rājānaṃ parivāreyyāthā"ti vatvā puna cintesi "imassa rañño imasmiṃ attabhāve maggaphalānaṃ upanissayo natthi, buddhā ca nāma upanissayaṃ disvāva dhammaṃ kathenti. Handāhaṃ mahājanaṃ sannipātāpemi, evaṃ hi sati satthā kassacideva upanissayena dhammaṃ desessati, sā mahājanassa upakārāya bhavissatī"ti. So tattha tattha sāsanaṃ pesesi, bheriñcārāpesi "ajja rājā

Tato mahājanopi cintesi "rājā kira bhagavato dassanatthaṃ gacchati, kīdisī vata bho bhagavato dhammadesanā bhavissati, kiṃ no nakkhattakīḷāya, tattheva gamissāmā"ti. Sabbe gandhapupphādīni gahetvā rañño āgamanaṃ ākaṅkhamānā magge aṭṭhaṃsu. Jīvakopi rañño paṭivedesi "kappitāni kho te deva hatthiyānāni, yassadāni kālaṃ maññasī"ti. Tattha yassadāni kālaṃ maññasīti upacāravacanametaṃ. Idaṃ vuttaṃ hoti "yaṃ tayā āṇattaṃ, taṃ mayā kataṃ, idāni yassa tvaṃ gamanassa vā agamanassa vā kālaṃ maññasi, tadeva attano ruciyā karohī"ti.

[159] Paccekā itthiyoti pāṭiyekkā itthiyo, ekekissā hatthiniyā ekekaṃ hatthinti vuttaṃ hoti. Ukkāsu dhāriyamānāsūti daṇḍadīpikāsu dhāriyamānāsu. Mahaccarājānubhāvenāti mahatā ca rājānubhāvena. Mahaccātipi pāli, mahatiyāti attho, liṅgapariyāyo esa. Rājānubhāvo vuccati rājiddhi. Kā panassa rājiddhīti? tiyojanasatānaṃ dvinnaṃ mahāraṭṭhānaṃ issariyasiri. Tassa hi "asukadivasaṃ rājā tathāgataṃ upasaṅkamissatī"ti paṭhamataraṃ saṃvidahaṇe asatipi taṃkhaṇaññeva pañca itthīsatāni purisavesaṃ gahetvā paṭimukkaveṭhanāni aṃse āsattakhaggāni maṇidaṇḍatomare gahetvā nikkhamiṃsu, yaṃ sandhāya vuttaṃ "paccekā itthiyo āropetvā"ti.