@7 ka. kāñcanamālā.... Brāhmaṇā dakkhiṇahatthaṃ ussāpetvā jayasaddaṃ ghosentā gacchanti, tesaṃ pariyante pañcaṅgikāni turiyāni. Tesaṃ pariyante dhanupantī parikkhepo, tassa pariyante hatthighaṭā, hatthīnaṃ pariyante gīvāya gīvaṃ paharamānā assapantī, assapariyante aññamaññaṃ saṃghaṭṭanarathā, rathapariyante bāhāya bāhaṃ paharamānā yodhā, tesaṃ pariyante attano attano anurūpāya ābharaṇasampattiyā virocamānā aṭṭhārasa seniyo. Iti yathāpariyante ṭhatvā khitto saro rājānaṃ na pāpuṇāti, evaṃ jīvako komārabhacco rañño parisaṃ saṃvidahitvā attanā rañño avidūrena gacchati "sace koci upaddavo hoti, sabbapaṭhamaṃ rañño jīvitadānaṃ dassāmī"ti. Ukkānaṃ pana ettakāni satāni vā sahassāni vāti paricchedo natthīti. Evarūpaṃ rājiddhiṃ sandhāya vuttaṃ "mahaccarājānubhāvena, yena jīvakassa komārabhaccassa ambavanaṃ, tena pāyāsī"ti.
Ahudeva bhayanti ettha cittutrāsabhayaṃ ñāṇabhayaṃ ārammaṇabhayaṃ ottappabhayanti catubbidhaṃ bhayaṃ, tattha "jātiṃ paṭicca bhayaṃ bhayānakanti ādinā nayena vuttaṃ cittutrāsabhayaṃ nāma. "tepi tathāgatassa dhammadesanaṃ sutvā yebhuyyena bhayaṃ saṃvegaṃ santāsaṃ āpajjantī"ti evamāgataṃ ñāṇabhayaṃ nāma. "etaṃ nūna taṃ bhayabheravaṃ āgacchatī"ti ettha vuttaṃ ārammaṇabhayaṃ nāma.
"bhīruṃ pasaṃsanti na hi tattha sūraṃ
bhayā hi santo na karonti pāpan"ti