@9 Ma.mū. 12/49/28 bhayabheravasutta. 10 saṃ. sa. 15/33/25 sādhusutta

Kasmā panesa bhītoti? andhakārenāti eke vadanti. Rājagahe kira dvattiṃsa mahādvārāni, catusaṭṭhi khuddakadvārāni. Jīvakassa ambavanaṃ pākārassa ca gijjhakūṭssa ca antarā hoti. So pācīnadvārena nikkhamitvā pabbatacchāyāya pāvisi, tattha pabbatakūṭena cando chādito, pabbatacchāyāya ca rukkhacchāyāya ca andhakāraṃ ahosīti, taṃpi akāraṇaṃ. Tadā hi ukkānaṃ satasahassānaṃpi paricchedo natthi.

Ayaṃ pana appasaddataṃ nissāya jīvake āsaṅkāya bhīto. Jīvako kirassa uparipāsādeyeva ārocesi "mahārāja appasaddakāmo bhagavā, appasaddeneva upasaṅkamitabbo"ti tasmā rājā turiyasaddaṃ nivāresi. Turiyāni kevalaṃ gahitamattāneva honti, vācaṃpi uccaṃ anuccāramānā accharāsaññāya āgacchanti, ambavanepi kassaci khipitasaddopi na suyyati. Rājāno ca nāma saddābhiratā honti. So taṃ appasaddaṃ nissāya ukkaṇṭhito jīvakepi āsaṅkaṃ uppādesi "ayaṃ jīvako `mayhaṃ ambavane aḍḍhateḷasāni bhikkhusatānī'ti āha. Ettha ca khipitasaddamattampi na suyyati, abhūtaṃ maññe, esa vañcetvā maṃ nagarato nīhariṃtvā purato balakāyaṃ uṭṭhā- petvā maṃ gaṇhitvā attano chattaṃ ussāpetukāmo. Ayañhi pañcannaṃ hatthīnaṃ balaṃ dhāreti. Mamañca avidūreneva gacchati, santike ca me āvudhahattho ekapurisopi natthi. Aho vata me anattho"ti. Evaṃ bhāyitvā ca pana abhīto viya saṇṭhātuṃpi nāsakkhi. Attano bhītabhāvaṃ tassa ācikkhi. Tena vuttaṃ "athakho rājā .pe. Na nigghoso"ti. Tattha sammāti vayassābhilāpo esa, kacci maṃ vayassāti vuttaṃ hoti, na palambhesīti yaṃ natthi, taṃ atthīti vatvā kacci maṃ na vippalambheyyāsi. Nigghosoti kathāsallāpanigghoso.

Mā bhāyi mahārājāti jīvako "ayaṃ rājā maṃ na jānāti `nāyaṃ paraṃ jīvitā voropetī'ti, sace kho pana naṃ na assāsessāmi, vinasseyyā"ti cintetvā daḷhaṃ katvā samussāsento "mā bhāyi mahārājā"ti vatvā "na taṃ devā"ti ādimāha. Abhikkamāti abhimukho kama gaccha, pavisāti attho. Sakiṃ vutte pana